सासवड : पुरंदर तालुक्यातील सामाजिक, आध्यात्मिक आणि राजकीय क्षेत्रात उल्लेखनीय कार्य करणाऱ्या ज्येष्ठ व्यक्तिमत्त्वांचा सन्मान करण्याच्या उद्देशाने आयोजित कार्यक्रमात जवळार्जुनचे माजी सरपंच अण्णासाहेब मारुती राणे आणि खळदचे माजी सरपंच बबनराव बाबुराव कामठे यांना ‘पुरंदर गुणवंत रत्न’ पुरस्काराने गौरविण्यात आले असल्याचे जिल्हा परिषदेचे माजी अध्यक्ष जालिंदर कामठे यांनी सांगितले. जालिंदर कामठे मित्र परिवाराच्या वतीने सासवड येथे आयोजित कार्यक्रमात मान्यवरांच्या उपस्थितीत हा पुरस्कार प्रदान करण्यात आला.

माजी जिल्हा परिषद अध्यक्ष जालिंदर कामठे आणि माजी कृषी शिक्षण संशोधन परिषदेचे अध्यक्ष विजयराव कोलते यांच्या हस्ते पुरस्काराचे वितरण करण्यात आले. यावेळी विविध क्षेत्रांतील मान्यवर, सामाजिक कार्यकर्ते, ग्रामस्थ मोठ्या संख्येने उपस्थित होते.

कार्यक्रमात बोलताना जालिंदर कामठे यांनी अण्णासाहेब राणे आणि बबनराव कामठे यांच्या कार्याचा गौरव केला. कामठे आणि राणे कुटुंबीयांचे गावाच्या तसेच तालुक्याच्या विकासासाठीचे योगदान अत्यंत मोलाचे आहे. दोघांनी माजी कृषी राज्यमंत्री दादासाहेब जाधवराव यांच्या नेतृत्वाखाली विविध सामाजिक आणि विकासात्मक उपक्रम राबवून समाजहिताचे कार्य केल्याचे त्यांनी नमूद केले.

अण्णासाहेब राणे यांनी जवळार्जुन गावात अनेक सामाजिक, धार्मिक आणि विकासकामांच्या माध्यमातून आपली वेगळी ओळख निर्माण केली आहे. ग्रामविकास, शिक्षण, सामाजिक ऐक्य आणि गावातील मूलभूत सुविधांच्या उभारणीत त्यांनी मोलाची भूमिका बजावली आहे. तर, खळदचे माजी सरपंच बबनराव कामठे यांनीही गावाच्या सर्वांगीण विकासासाठी उल्लेखनीय योगदान दिले आहे.

ग्रामीण भागातील विकासकामे, सामाजिक उपक्रम आणि जनसामान्यांच्या प्रश्नांसाठी त्यांनी सातत्याने पाठपुरावा केला. असे विजयराव कोलते यांनी आपल्या मनोगतात सांगितले. कार्यक्रमाला निरा मार्केट कमिटीचे माजी सभापती नंदूकाका जगताप, भानुदास जगताप, हरिभाऊ फुले, खळद ग्रामपंचायत सदस्य योगेश कामठे, शिवाजी साळुंखे, सचिन पठारे, नंदकुमार कामठे, दत्ता राऊत, शिवाजी गोडसे, संग्राम राणे, आप्पासो राणे, शिवाजी राणे, विजय राणे, चंद्रकांत कामठे, सुनील पोटे, नवनाथ राणे यांच्यासह खळद, जवळार्जुन येथील ग्रामस्थ मोठ्या संख्येने उपस्थित होते. पुरस्कार वितरण सोहळ्यानंतर माजी आमदार संजय जगताप यांनी अण्णासाहेब राणे यांचा शाल व श्रीफळ देऊन विशेष सत्कार केला.

हेही वाचा : Pune District : राष्ट्रीय पातळीवर राजगुरुनगर सहकारी बँकेची दुहेरी कामगिरी