Pune Traffic Jam – पुणे महापालिकेने पुणे अर्बन मोबिलिटी सेल स्थापन करण्याची प्रक्रिया सुरू असून, तीन वर्षांसाठी सल्लागार म्हणून अर्न्स्ट अँड यंग एलएलपीची नियुक्ती करण्यास मान्यता देण्याचा प्रस्ताव स्थायी समितीसमोर ठेवण्यात आला होता. या कामासाठी दरवर्षी दोन कोटी ३७ लाख रुपये (करविरहित) खर्च अपेक्षित आहे. या प्रस्तावाला मान्यता दिल्याचे समितीचे अध्यक्ष श्रीनाथ भिमाले यांनी सांगितले.

शहरातील वाढती वाहनसंख्या, वाहतूक कोंडी, अपघातप्रवण ठिकाणे आणि रस्त्यांच्या समस्यांवर अधिक परिणामकारक उपाययोजना करण्यासाठी पुणे महापालिका आता रिअल टाइम ट्रॅफिक डेटाचा आधार घेणार आहे. विविध यंत्रणांकडून उपलब्ध होणारा वाहतूक आणि प्रवासविषयक डेटा एकत्र करून त्याआधारे वाहतूक नियोजन, रस्ते विकास आणि पायाभूत सुविधांबाबत निर्णय घेण्याचा प्रस्ताव पथ विभागाने तयार केला आहे.

महापालिका आणि वाहतूक पोलिसांमध्ये समन्वय साधण्यासाठी एकात्मिक वाहतूक व्यवस्थापन कक्ष उभारण्यात येणार आहे. ढोले रस्ता परिसरात प्रस्तावित या कक्षात महापालिकेची सुमारे दहा जणांची टीम, तसेच एससीएमटीआरची टीम कार्यरत राहणार असल्याची माहिती भिमाले यांनी दिली आहे. या सर्व माहितीच्या आधारे एकात्मिक वाहतूक नियोजन व व्यवस्थापन मंच विकसित करण्यात येणार आहे.

शहरातील वाहतूक कोंडीची ठिकाणे, वारंवार अडथळे निर्माण होणारे मार्ग आणि अपघातप्रवण क्षेत्रे ओळखून त्यावर तत्काळ उपाययोजना करणे शक्य होईल. सिग्नल समन्वय, मार्ग नियोजन, वाहनतळ व्यवस्थापन, चौकांची पुनर्रचना, तसेच पदपथ आणि सायकल मार्गांच्या विकासालाही या माहितीचा आधार मिळणार असल्याचे भिमाले म्हणाले.

मूळ कारणांचा शोध
विशेष म्हणजे वाहतूक कोंडीचा संबंध खड्डे, रस्त्यांची खराब अवस्था, सेवा वाहिन्यांसाठी केलेले खोदकाम आणि नागरिकांच्या तक्रारींशी जोडून समस्येच्या मूळ कारणांचा शोध घेतला जाणार आहे. उपाययोजना करण्यापूर्वी आणि त्यानंतर वाहतुकीवर झालेला परिणामही मोजला जाणार आहे.