Pune Shirur Elevated Corridor : महाराष्ट्र राज्य पायाभूत सुविधा विकास महामंडळामार्फत हाती घेण्यात आलेल्या पुणे-शिरूर उन्नत मार्ग, तळेगाव-चाकण-शिक्रापूर आणि हडपसर-यवत या महत्त्वाच्या रस्ते विकास प्रकल्पांच्या भूमिपूजन सोहळ्याच्या नियोजनासाठी पुणे जिल्हाधिकारी कार्यालयात आयोजित आढावा बैठकीस शिरूर-हवेलीचे आमदार ज्ञानेश्वर कटके उपस्थित होते.

तिन्ही महत्त्वाच्या रस्ते विकास प्रकल्पांचे भूमिपूजन शनिवार (दि.१८) दुपारी १.३० वाजता, गणेश कला क्रीडा मंच, पुणे येथे केंद्रीय रस्ते वाहतूक व महामार्ग मंत्री नितीन गडकरी यांच्या प्रमुख उपस्थितीत, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, सार्वजनिक बांधकाम मंत्री शिवेंद्रसिंहराजे भोसले यांच्या हस्ते होणार आहे. बैठकीत तिन्ही प्रकल्पांचा सविस्तर आढावा घेण्यात आला.

पुणे-शिरूर उन्नत मार्ग (५३.४० कि.मी.) प्रकल्पासाठी ७,५१५ कोटींची तरतूद केली असून, प्रकल्पामध्ये ३५ किमी चार पदरी उन्नत मार्ग, समांतर चार पदरी महामार्ग, ७ किमी प्रस्तावित मेट्रो मार्गाचा समावेश आहे. तळेगाव-चाकण-शिक्रापूर प्रकल्पासाठी ३,९२३.८९ कोटींची तरतूद केली असून, २६.३० कि.मी. चार पदरी उन्नत मार्ग आणि ५३.२० कि.मी. समांतर महामार्ग प्रस्तावित आहे.

हडपसर-यवत प्रकल्पासाठी ५,२६२.३६ कोटींची तरतूद केली असून, २५.८० किमी सहा पदरी उन्नत मार्ग, ३१.६५ किमी समांतर महामार्ग आणि ९.७५ किमी प्रस्तावित मेट्रो मार्गाचा समावेश आहे. हे तिन्ही महत्त्वाकांक्षी प्रकल्प पुढील चार वर्षांत पूर्ण करण्याचे नियोजन केले आहे. याप्रसंगी सार्वजनिक बांधकाम मंत्री शिवेंद्रसिंहराजे भोसले, कृषिमंत्री दत्तात्रय भरणे, जिल्हाधिकारी जितेंद्र डूडी, संबंधित लोकप्रतिनिधी व वरिष्ठ अधिकारी उपस्थित होते. खासदार सुप्रिया सुळे, खासदार अमोल कोल्हे यांनी व्हिडिओ कॉन्फरन्सद्वारे बैठकीत सहभाग नोंदविला आहे.

दर्जेदार, नियोजित मुदतीत पूर्ण करावीत
यावेळी आमदार माऊली कटके यांनी पुणे-शिरूर उन्नत मार्गाच्या पर्यायासाठी वाघोली जकात नाका–केसनंद रोड ते कटकेवाडी तसेच लोहगाव हद्द ते कटकेवाडी या ३० मीटर रुंदीच्या आरपी रस्त्यांचे भूसंपादनासह काम तातडीने हाती घेण्याची मागणी केली. उन्नत मार्ग प्रकल्पामुळे बाधित होणाऱ्या शेतकरी, नागरिक व व्यावसायिकांना योग्य व मोबदला मिळावा,

भूसंपादन प्रक्रिया पारदर्शकपणे राबविण्यात यावी, प्रकल्पाची अंमलबजावणी करताना नागरिकांना कमीत कमी त्रास होईल, यासाठी आवश्यक उपाययोजना करण्याचीही त्यांनी मागणी केली. तिन्ही प्रकल्पांची कामे दर्जेदार, नियोजित मुदतीत पूर्ण व्हावीत, यासाठी संबंधित यंत्रणांनी सातत्याने समन्वय ठेवावा, अशी सूचनाही त्यांनी केली.