Pune Ring Road- पुणे महानगरपालिकेच्या हद्दीत प्रस्तावित 65 मीटर रुंदीच्या पुणे शहर इनर रिंग रोडसाठी भू-संपादनाची मोजणी करण्यास वाघोली आणि लोहगाव परिसरातील शेतकरी व गटधारकांनी तीव्र विरोध केला. मोजणीपूर्वी बाधित शेतकर्‍यांना अधिकृत नोटिसा देण्यात आलेल्या नाहीत, तसेच भू-संपादनाचा मोबदला, त्याचे निकष आणि पुनर्वसनाबाबत प्रशासनाने स्पष्ट भूमिका जाहीर केलेली नाही, असा आक्षेप घेत शेतकर्‍यांनी मोजणी रोखली. त्यामुळे दोन्ही ठिकाणी मोजणी होऊ शकली नाही.

अखेर पंचनामा करून प्रशासनाच्या पथकाला माघारी फिरावे लागले. लोहगाव येथे मंगळवारी (दि. 29) पुणे महानगरपालिकेच्या भू-संपादन व बांधकाम विभागाचे अधिकारी आणि भूमापक पथक प्रस्तावित रिंग रोडसाठी जमीन मोजणी करण्यासाठी दाखल झाले होते. मात्र, मोजणीची अधिकृत नोटीस मिळाली नसल्याचे सांगत शेतकर्‍यांनी कार्यवाहीला हरकत घेतली. रस्त्यासाठी एकाच बाजूच्या जमिनीचे संपादन केले जात असल्याचा आक्षेपही यावेळी घेण्यात आला.

मोजणीपूर्वी बाधित शेतकर्‍यांना विश्वासात घेऊन भू-संपादनाची प्रक्रिया, रस्त्याचा आराखडा आणि मोबदल्याची माहिती स्पष्ट करावी, अशी मागणी करण्यात आली. विरोधामुळे मोजणी होऊ न शकल्याचा पंचनामा करण्यात आला. दरम्यान, बुधवारी (दि. 30) वाघोली येथे 65 मीटर रुंदीच्या रिंग रोडसाठी मोजणीचे नियोजन करण्यात आले होते. पथक दाखल होताच स्थानिक गटधारक व शेतकर्‍यांनी कार्यवाहीला विरोध केला.

भू-संपादनामुळे बाधित होणार्‍या शेतकर्‍यांना किती मोबदला मिळणार, त्याचे निकष काय असतील, तसेच भू-संपादनामुळे भूमिहीन होणार्‍या कुटुंबांच्या पुनर्वसनासाठी काय उपाययोजना करण्यात येणार आहेत, याबाबत प्रशासनाकडून स्पष्टता नसल्याचे शेतकर्‍यांनी सांगितले. प्रस्तावित 65 मीटर रिंग रोडचा नकाशामध्ये सलग आराखडा स्पष्ट दिसत नसल्याचाही आक्षेप घेण्यात आला. त्यामुळे कोणत्या गटातील किती जमीन रस्त्यासाठी बाधित होणार आहे, याची स्पष्ट माहिती देऊनच पुढील मोजणी करावी, अशी भूमिका शेतकर्‍यांनी घेतली.

आधी बैठक, मोबदल्याची स्पष्टता; मगच मोजणी
वाघोली आणि लोहगाव परिसरातील सर्व बाधित शेतकरी व गटधारकांना विश्वासात घेऊन प्रशासनाने संयुक्त बैठक घ्यावी. रिंग रोडचा आराखडा स्पष्ट करावा, भू-संपादनाचा मोबदला व त्याचे निकष तसेच पुनर्वसनाबाबतची भूमिका स्पष्ट करावी आणि त्यानंतरच मोजणीची कार्यवाही करावी, अशी मागणी शेतकर्‍यांनी केली आहे. शेतकर्‍यांच्या विरोधामुळे दोन्ही ठिकाणी मोजणीचे काम होऊ शकले नाही.

संबंधित मनपा अधिकारी व भूमापकांच्या उपस्थितीत मोजणी न झाल्याचा पंचनामा करण्यात आला. त्यामुळे 65 मीटर रिंग रोडच्या भू-संपादनाची प्रक्रिया सध्या रखडली असून, पुढील मोजणीपूर्वी प्रशासन शेतकर्‍यांसोबत बैठक घेते का, याकडे परिसरातील शेतकर्‍यांचे लक्ष लागले आहे.