Pune Porsche Case – कल्याणीनगर पोर्शे कार अपघातानंतर अल्पवयीनांकडून होणारे गुन्हे रोखण्यासाठी कायद्यात आवश्यक बदल करणे गरजेचे आहे. १६ वर्षांवरील मुलांकडून गंभीर स्वरूपाचे गुन्हे घडल्यास त्यांच्या गुन्ह्याचे गांभीर्य लक्षात घेऊन कठोर कारवाईची तरतूद असावी, अशी मागणी अनिश अवधिया यांचे वडील ओम् अवधिया यांनी केली.

कल्याणीनगर येथे १९ मे २०२४ मध्ये झालेल्या पोर्शे कार अपघातात अनिश अवधिया आणि अश्विनी कोस्टा यांचा मृत्यू झाला होता. या घटनेनंतर व्यवस्थेत सुधारणा व्हावी आणि कायद्याची भीती निर्माण व्हावी, यासाठी आपण प्रयत्न करत असल्याचे अवधिया यांनी सांगितले. ते म्हणाले की, अल्पवयीन मुलाने दारू पिऊन वाहन चालवले आणि त्यानंतर काही तासांतच त्याला जामीन मिळतो, ही गंभीर बाब आहे.

अशा घटनांमध्ये कायद्याची भीती निर्माण होण्यासाठी कठोर तरतुदी असणे आवश्यक आहे. गुन्हा करण्यासाठी लहान मुलांना पुढे केले जाऊ नये. अनेक पालक अल्पवयीन मुलांना महागड्या गाड्या आणि पैसे देतात. त्यामुळे मुलांमध्ये ऐषआरामाची सवय लागते आणि कायद्याची भीती राहत नाही. अल्पवयीन मुलांना गुन्ह्यांसाठी प्रवृत्त करून त्यांना पैसे देण्याचे प्रकारही समोर येत आहेत.

त्यामुळे पालकांनी मुलांना वाहन देताना त्यांच्या वयाचा आणि वाहन चालवण्याच्या कायदेशीर परवानगीचा विचार करावा, असे आवाहन त्यांनी केले. या प्रयत्नांना पुणेकरांनी दिलेल्या पाठिंब्याबद्दल अवधिया यांनी आभार मानले. तसेच, पुणे पोलिसांनी केलेल्या सहकार्याबद्दलही त्यांनी कृतज्ञता व्यक्त केली. गुन्हे रोखण्यासाठी केवळ कायदा करणे पुरेसे नसून त्याची प्रभावी अंमलबजावणी होणेही आवश्यक असल्याचे त्यांनी नमूद केले.