DJ Sound Limit – शहरात वर्षभरात सुमारे १०० दिवस विविध सण, उत्सव आणि कार्यक्रम होत असतात. मात्र, या काळातील वाढत्या ध्वनिप्रदूषणामुळे पुणेकर त्रस्त होत असल्याने आगामी दहीहंडी, गणेशोत्सवासह सर्वच सण- उत्सवांसाठी ध्वनिप्रदूषणाबाबत एकच नियम, एकच भूमिका ठेवण्यात येणार आहे. जास्तीत जास्त चार बेस आणि चार टॉप वापरण्यास परवानगी असेल.

नियमांचे उल्लंघन झाल्यास कायदेशीर कारवाई केली जाईल, असा स्पष्ट इशारा पोलीस आयुक्त अमितेशकुमार यांनी दिला आहे. गणेश कला क्रीडा मंच येथे दहीहंडी व गणेशोत्सव मंडळांच्या समन्वय बैठकीत ते बोलत होते. महापालिकेचे अतिरिक्त आयुक्त प्रजित नायर यांच्यासह पोलीस, महापालिका अधिकारी आणि मंडळांचे पदाधिकारी उपस्थित होते.

प्लाझ्मा, प्रेशर मिड, तसेच सहा किंवा आठ बेस- टॉपच्या भिंतीमुळे आवाजाची पातळी थेट १०० ते १०५ डेसिबलपर्यंत जाते. त्यामुळे मंडळांनी प्लाझ्मा, प्रेशर मिड आणि लेझर लाइट न वापरण्याचा घेतलेला निर्णय कौतुकास्पद आहे. उत्सवाचा आनंद कायम ठेवत नागरिकांना त्रास होणार नाही, याची काळजी घ्या, असे आवाहन आयुक्तांनी केले.

गणेशोत्सवात १९, २०, २२, २३ आणि २५ सप्टेंबर या पाच दिवशी रात्री १२ वाजेपर्यंत ध्वनिक्षेपकांना परवानगी असेल. अन्य दिवशी रात्री १० वाजेपर्यंतच ध्वनिक्षेपक वाजवता येतील. आक्षेपार्ह नृत्य सादरीकरणासही परवानगी नसेल, असे आयुक्तांनी स्पष्ट केले.

एसी कक्षातून निर्णय घेऊ नका
सर्व पोलीस ठाण्यांच्या प्रभारी अधिकाऱ्यांनी मंडळांच्या कार्यकर्त्यांसोबत प्रत्यक्ष बैठका घेऊन वाहतूक, गर्दी व्यवस्थापन, तसेच महिला- बालकांच्या सुरक्षेचे नियोजन करावे. एसी कक्षात बसून निर्णय घेऊ नका, अशा स्पष्ट सूचना आयुक्तांनी दिल्या. अर्ज मिळाल्यानंतर २४ तासांत परवानग्या देण्याचे आदेशही त्यांनी दिले.

लक्ष्मी रस्ता व टिळक रस्त्यावरील मिरवणुकांसाठी स्वतंत्र समिती स्थापन केली जाणार असून, वेळेपेक्षा मिरवणुकीची सुरक्षितता आणि गर्दी नियंत्रणाला प्राधान्य दिले जाईल. गणेश मंडळांनी अमली पदार्थविरोधी मोहिमेत सहभागी होऊन प्रबोधनात्मक देखावे सादर करावेत, असे आवाहनही आयुक्तांनी केले.