Pune Palkhi Sohala – संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या पालखी सोहळ्यांचे गुरुवारी पुण्यात भक्तिमय वातावरणात उत्स्फूर्त स्वागत करण्यात आले. महापौर मंजुषा नागपुरे यांनी कळस आणि बोपोडी येथे दोन्ही पालख्यांचे पारंपरिक पद्धतीने औक्षण करून पादुकांचे दर्शन घेतले. या वेळी पुणे प्रथम- सेवावारी २०२६ उपक्रमांतर्गत पालख्यांवर पुष्पवृष्टी करण्यात आली. महापौर नागपुरे यांनी वारकरी बांधवांशी संवाद साधत त्यांच्या भावना जाणून घेतल्या,

तसेच वारकरी महिलांसमवेत फुगडी खेळून वारीतील समता, भक्ती आणि सेवाभावाचा संदेश दिला. या वेळी उपमहापौर परशुराम वाडेकर, विरोधी पक्षनेते ॲड. निलेश निकम, राष्ट्रवादी गटनेते सोपान चव्हाण, पक्षनेते नितीन गावडे, महापालिका आयुक्त नवलकिशोर राम, स्थानिक लोकप्रतिनिधी, महापालिकेचे अधिकारी, तसेच मोठ्या संख्येने वारकरी आणि नागरिक उपस्थित होते.

संतश्रेष्ठ ज्ञानेश्वर महाराज आणि जगद्गुरू संत तुकाराम महाराज यांच्या पालख्यांचे पुण्यात आगमन हा प्रत्येक पुणेकरासाठी अभिमानाचा क्षण आहे. वारकरी बांधवांची सेवा हीच संतसेवा मानून महापालिकेचे सर्व विभाग पुणे प्रथम-सेवावारी २०२६ अंतर्गत अहोरात्र कार्यरत आहेत. स्वच्छता, आरोग्य, पाणीपुरवठा आणि सुरक्षेसह सर्व सुविधा उपलब्ध करून दिल्या असून, संतांनी दिलेला समता आणि बंधुतेचा संदेश अधिकाधिक लोकांपर्यंत पोहोचविण्यासाठी आम्ही कटिबद्ध असल्याच्या भावना महापौर नागपुरे यांनी व्यक्त केल्या.