Pune News – स्वतः निवडून दिलेल्या नगरसेवकांनी अपेक्षाभंग केल्यानंतर पुणेकरांनी डीजेविरोधात आता ऑनलाइन याचिकेचा आधार घेतला आहे. मोठ्या आवाजात वाजणाऱ्या डीजेला बंद करण्यासाठी चेंज डॉट ऑर्गच्या संकेतस्थळावर सुरू असलेल्या याचिकेला फक्त दोन दिवसांत सुमारे २३ हजारांहून अधिक नागरिकांनी पाठिंबा जाहीर केला आहे.

सोमवारी महापालिकेत गणेशोत्सवाच्या तयारीच्या बैठकीत डीजे वाजवण्याच्या निर्णयावर एकमताने शिक्कामोर्तब झाले होता. डीजेला विरोध करणाऱ्या सामान्य नागरिकांना चक्क या बैठकीतून बाहेरचा रस्ता दाखविण्यात आला होता. त्यामुळे अनेकांनी महापालिकेच्या कारभारावरही टीका केली. एकीकडे शेजारील सोलापूर जिल्ह्यात डीजेमुक्त गणेशोत्सव साजरा होत आहे. मात्र, दुसरीकडे पुण्यात नागरिकांना डीजे विरोधात आवाज उठवण्यासही मनाई केल्याबद्दल अनेकांनी नाराजी व्यक्त केली.

त्याच वेळी डीजेविरोधी भूमिका ठाम असल्याचा दावा करणाऱ्या महापौरांनी ऐनवेळी माघार घेतल्यानेही नागरिकांची कोंडी वाढली आहे. या पार्श्वभूमीवर ऑनलाइन याचिकेला मिळालेला मोठा प्रतिसाद लक्षवेधी ठरला आहे. अवघ्या दोन दिवसांत २२ हजारांहून अधिक नागरिकांनी याचिकेला पाठिंबा दिल्याने डीजे आणि ध्वनिप्रदूषणाचा मुद्दा आता केवळ मंडळे आणि प्रशासनापुरता मर्यादित राहिला नसून, नागरिकांच्या व्यापक विरोधाचा विषय बनल्याचे दिसून येत आहे.