Pune Gatari Celebration – घरगुतीपेक्षा हॉटेलात जाऊन गटारी साजरी करण्यास पुणेकरांनी प्राधान्य दिले. बुधवारी (दि.१२) २५ ते ३० टन मासळी, ७०० टन चिकन आणि सुमारे दीड ते दोन हजार मटण फस्त करत पुणेकरांनी गटारी साजरी केली. उद्यापासून (गुरूवार दि. १३) श्रावण सुरू होत असून या महिन्यात अनेकजण मांसाहार करत नाहीत. त्यानंतर गणोशोत्सव, नवरात्र असल्याने दसऱ्यापर्यंत मांसाहार करता येत नाही.

त्यामुळे आषाढ महिन्यात आवर्जून मांसाहारावर भर दिला जातो. बुधवार आषाढ महिन्यातील शेवटचा दिवस असल्याने पुणेकरांनी मांसाहाराचा बेत आखला होता. त्यामुळे सकाळपासूनच मटण, मासळी आणि चिकणच्या खरेदीसाठी गर्दी झाली होती. संध्याकाळी ही गर्दी वाढत गेली. किरकोळ खरेदीदारांबरोबर हॉटेल व्यावसायिकांच्याही मोठ्या ऑर्डर होत्या. याविषयी मासळीचे व्यापारी ठाकुर परदेशी म्हणाले, मासळीला मागणी आहे.

गटारीच्या तुलनेत अपेक्षित मागणी नाही. घरगुतीपेक्षा हॉटेल व्यावसायिकांची जास्त मागणी आहे. सुरमई, कोळंबी आणि पापलेटला नागरिकांची पसंती होती. आवकेपेक्षा मागणी कमी असल्याने सर्व प्रकारच्या मासळीच्या भावात ५ ते १० टक्‍क्‍यांनी घट झाली. मटण विक्रेते संघटनेचे अध्यक्ष प्रभाकर कांबळे म्हणाले, नेहमी रविवारी असते, त्याप्रमाणे मटणाला मागणी आहे. गटारीचा विचार करता मागणी कमी आहे. मागील आठवड्यातच पुणेकरांनी मांसाहार करण्यास पसंती दिली.

पती-पत्नी दोघेही नोकरी करतात. त्यांना बुधवारी सुट्टी नाही. त्यामुळे त्यांनी हॉटेलमध्ये जावून गटारी साजरी करण्यास प्राधान्य दिले. चिकन व्यावसायिक रुपेश परदेशी म्हणाले, चिकनला मोठी मागणी होती. पुणे, पिपरी चिंचवड शहरात मिळून नागरिकांनी तब्बल ७०० टन चिकन फस्त केले. हॉटेल व्यावसायिक आणि घरगुती ग्राहकांची सम प्रमाणात मागणी होती. मागणीच्य तुलनेत पुरवठा असल्याने चिकनचे भाव स्थिर आहेत.