Pune News – राज्यातील वाढती बेरोजगारी, पेपरफुटीची प्रकरणे, परीक्षांमधील गैरप्रकार आणि तरुणांच्या भवितव्याशी संबंधित विविध प्रश्नांकडे सरकारचे लक्ष वेधण्यासाठी राष्ट्रवादी काँग्रेस पक्ष शरदचंद्र पवार पक्षातर्फे गुरुवारी पुण्यात बेरोजगार हक्क एल्गार तिरंगा दुचाकी रॅली काढण्यात आली. शिवाजीनगर येथील पक्ष कार्यालयापासून पुणे जिल्हाधिकारी कार्यालयापर्यंत ही रॅली काढण्यात आली.

पुणे शहर पूर्व आणि पश्चिम विभागाचे अध्यक्ष अनुक्रमे श्रीकांत पाटील आणि विशाल तांबे यांच्या आयोजनातून ही रॅली काढण्यात आली. हातात तिरंगा आणि बेरोजगारी, पेपरफुटी, तसेच पारदर्शक परीक्षा व्यवस्थेच्या मागण्यांचे फलक घेऊन आंदोलकांनी सरकारविरोधात घोषणाबाजी केली. यावेळी राष्ट्रवादी काँग्रेस पक्षाचे प्रवक्ते अंकुश काकडे, माजी मंत्री हर्षवर्धन पाटील, पुणे महापालिकेतील गटनेते काका चव्हाण,

नगरसेविका अनिता इंगळे यांच्यासह पक्षाचे आजी- माजी पदाधिकारी उपस्थित होते. पेपरफुटीचा प्रश्न संपलेला नसून, रोजगाराचा प्रश्नही गंभीर आहे. चाकणमधील उद्योग बाहेर गेल्यास या परिसरातील नागरिकांच्या रोजगाराचा प्रश्न अधिक गंभीर होऊ शकतो. त्यामुळे या उद्योगांना महाराष्ट्रातच टिकवून ठेवण्यासाठी केंद्र आणि राज्य सरकारने ठोस पावले उचलावीत, अशी मागणी हर्षवर्धन पाटील यांनी केली. लाखो विद्यार्थी उच्च शिक्षण घेत स्पर्धा परीक्षांची वर्षानुवर्षे तयारी करतात. मात्र परीक्षा प्रक्रियेत पेपरफुटी, गैरप्रकार किंवा अनियमितता झाल्यास विद्यार्थ्यांची संपूर्ण मेहनत वाया जाते, असे श्रीकांत पाटील म्हणाले.