प्रभात वृत्तसेवा पुणे – पुण्यातील विविध सामाजिक संस्था आणि गणेशोत्सव मंडळांनी एकत्र येत ससून रुग्णालय आवारातील श्रीवत्स संस्थेतील चिमुकल्यांसोबत आपुलकीची दिवाळी साजरी केली.शनिवार पेठ मेहुणपुरा सार्वजनिक गणेशोत्सव मंडळ आणि सहयोगी संस्थांतर्फे दिवाळीचा आनंद समाजातील प्रत्येक घटकाला घेता यावा, यासाठी आपुलकीची दिवाळी या कार्यक्रमाचे आयोजन करण्यात आले होते. या वेळी शि. प्र. मंडळी नियामक मंडळ सदस्य सुधीर काळकर, श्रीमंत दगडूशेठ हलवाई सार्वजनिक गणपती ट्रस्टचे कोषाध्यक्ष महेश सूर्यवंशी, सामाजिक कार्यकर्ते आनंद सराफ, उद्योजक रसिक नहार, संस्थेचे सचिन अभ्यंकर, मेहुणपुरा मंडळाचे आनंद कावणकर, पराग ठाकूर, शिरीष मोहिते, रोहन जोशी आदी उपस्थित होते.कार्यक्रमाचे यंदा ३२ वे वर्ष आहे. विविध गाण्यांवर चिमुकल्यांनी नृत्य केले. संस्थेला आवश्यक असणारी आर्थिक आणि वस्तुरुपी भेट देण्यात आली. गायिका रश्मी मोघे आणि राहुल जोशी यांनी या वेळी गायन केले. सूर्यवंशी आणि ठाकूर यांनी मनोगत व्यक्त केले. शनिवार पेठ मेहुणपुरा सार्वजनिक गणेशोत्सव मंडळासह एलआयसी परिवार, इमर्सन कंपनी, सेवानिवृत्त एसटी अधिकारी, नूमवि मराठी शाळा, नवा विष्णू चौक नवरात्र उत्सव मंडळ, शनिपार मित्र मंडळ, कुंभोजकर मित्रपरिवार, जनता बँक मित्रपरिवार, आफळे अकादमी, सैनिक मित्र परिवार, हिंदू महिला सभा, मंदार ठाकूरदेसाई मित्र परिवार, अभेद्य वाद्य पथक, नहार परिवार आदी संस्थांनी उपक्रमात सहभाग घेतला.
