BJP leader Pramod Kondhare : गेल्या काही दिवसांपूर्वी पुणे महानगर पालिकेच्या महिला अधिकाऱ्याला त्रास दिल्याबद्दल भाजप नेता ओंकार कदम याच्यावर गुन्हा दाखल झाला होता. हे प्रकरण ताजे असतानाच आता भाजप नेते प्रमोद कोंढरे यांच्यावर महिला पोलिस अधिकाऱ्याचा विनयभंग केल्याप्रकरणी गुन्हा दाखल करण्यात आला आहे. तसेच या प्रकरणावर आता भाजप नेत्या चित्रा वाघ यांची प्रतिक्रिया समोर आली असून, त्यांनी कठोरात कठोर शिक्षा व्हावी यासाठी मी पाठपुरावा करणार असल्याचे म्हटले आहे. या घटनेनंतर कोंढरे यांनी काल रात्री महामंत्री पदाचा राजीनामा दिला असून, पुणे शहर अध्यक्ष धीरज घाटे यांनी त्यांना पदमुक्त करण्यात आले आहे. सध्या या प्रकरणाचा अधिक तपास पोलिस करत आहेत आणि पुराव्याचा भाग म्हणून सीसीटीव्ही फुटेजची तपासणी केली जात आहे. ही घटना सोमवारी केंद्रीय मंत्री नितीन गडकरी पुणे दौऱ्यावर आले असताना घडली होती. चित्रा वाघ काय म्हणाल्या? आज अत्यंत संतापजनक आणि दुर्दैवी घटना कानावर आली. प्रमोद विठ्ठल कोंढरे, जो भारतीय जनता पक्षाचा पुणे शहराचा पदाधिकारी होता त्याने एका महिला पोलीस अधिकाऱ्याचा विनयभंग केला. आताचं यासंदर्भात मी पुण्याचे भाजपा शहर अध्यक्ष धीरज घाटेजी यांच्याकडून माहीती घेतली असता संबंधित पदाधिकाऱ्याला तात्काळ पदमुक्त केल्याची माहीती त्यांनी दिली. इतकच नाही तर त्याच्यावर गुन्हा दाखल करून त्याला अटक देखील करण्यात आली आहे. अर्थात, त्याला कठोरात कठोर शिक्षा व्हावी यासाठी मी पाठपुरावा करणार आहे. भारतीय जनता पक्ष हा संविधान, कायदा आणि महिलांच्या सन्मानावर विश्वास ठेवणारा पक्ष आहे. कोणत्याही परिस्थितीत, महिला सशक्ततेविरुद्ध मग तो आमच्या पक्षाचा का असेना वागणाऱ्याला कधीही माफ केले जाणार नाही. अशी प्रतिक्रिया चित्रा वाघ यांनी एक्सवरून दिली आहे. दावा फेटाळले मात्र, प्रमोद कोंढरे यांनी त्यांच्यावर करण्यात आलेला दावा फेटाळून लावला आहे. कोंढारे यांनी पत्राद्वारे करण्यात आलेले फेटाळले आहेत. गैरसमजुतेतून हा प्रकार घडल्याचा दावा त्यांनी केला आहे. या प्रकरणी प्रमोद कोंढरे यांनी माझ्याकडे राजीनामा पाठवला आहे. जोपर्यंत झालेल्या प्रकाराची चौकशी होत नाही तोपर्यंत मी पदावर राहणार नसल्याचे त्यांनी सांगितले. आम्ही तो राजीनामा मंजूर केला आहे. धीरज घाटे (भाजपा पुणे शहर अध्यक्ष) नेमकं काय घडलं? एका कार्यक्रमाच्या निमित्ताने भाजपचे नेते शनिवार वाड्याजवळ जमले होते. त्यानंतर भाजपचे कसबा पेठचे आमदार हेमंत रासने हे कार्यकर्त्यांना आणि बंदोबबस्तासाठी असलेल्या पोलिसांना घेऊन चहा पिण्यासाठी घेऊन गेले. त्यावेळी प्रमोद कोंढरे यांनी गर्दीचा फायदा घेऊन महिला पोलीस निरीक्षकाला लज्जा उत्पन्न होईल असा स्पर्श केला. त्यानंतर त्या महिला पोलीस अधिकाऱ्याने ही बाब वरिष्ठांच्या निदर्शनास आणून दिली. त्यानंतर सीसीटीव्ही फुटेजची तपासणी करण्यात आली. हेही वाचा : “माझ्या खांद्यावर तिरंगा, जय हिंद, जय भारत” ; अंतराळातून शुभांशू शुक्लाचा देशासाठी पहिला संदेश
