पुणे : एमपीएससी विद्यार्थ्यांच्या मागण्यांसाठी एस. एम. जोशी पुलाजवळ, पत्रकार भवनाशेजारी सुरू असलेल्या आंदोलनाचे पूर्वपरवानगीशिवाय ड्रोनद्वारे चित्रीकरण केल्याप्रकरणी फोटोग्राफरविरुद्ध विश्रामबाग पोलिसांनी गुन्हा दाखल केला आहे. दिगंबर भारत खारे (वय ३५) असे त्याचे नाव आहे. पोलिसांनी त्याच्याकडून सुमारे ५० हजार रुपये किमतीचा ड्रोन कॅमेरा आणि रिमोट कंट्रोलर जप्त केला आहे.

पोलिसांनी दिलेल्या माहितीनुसार, १ ऑक्टोबरपासून एस. एम. जोशी पुलाजवळ एमपीएससी विद्यार्थ्यांच्या विविध मागण्यांसाठी आंदोलन सुरू आहे. या ठिकाणी गोपनीय माहिती संकलित करण्यासाठी विश्रामबाग पोलीस ठाण्यातील पोलीस हवालदार युवराज टेळे यांची नेमणूक करण्यात आली होती.

५ ऑक्टोबर रोजी सायंकाळी साडेसातच्या सुमारास आंदोलनस्थळी जमलेल्या गर्दीच्या वर ड्रोन उडताना टेळे यांना दिसला. त्यांनी शोध घेतला असता, आंदोलनाच्या मागील बाजूस जनरेटरजवळ एक व्यक्ती ड्रोन रिमोट कंट्रोलरच्या साहाय्याने ड्रोन चालवत असल्याचे आढळले. याबाबत त्यांनी वरिष्ठ पोलीस निरीक्षक नवनाथ जगताप आणि बंदोबस्तावरील सहायक पोलीस निरीक्षक कुदळे यांना माहिती दिली.

पोलिसांनी ड्रोन चालविणाऱ्या व्यक्तीकडे चौकशी केली असता, त्याने आपले नाव दिगंबर खारे असल्याचे सांगितले. ड्रोन उडवून चित्रीकरण करण्यासाठी आवश्यक परवाना किंवा स्थानिक पोलिसांची परवानगी नसल्याचे त्याने सांगितल्याचा उल्लेख फिर्यादीत आहे.

आंदोलनात सहभागी असलेल्या प्रमोद पाटील, शिवराज मोरे, ऋषिकेश गांगुर्डे आणि अक्षय कांबळे यांच्या सांगण्यावरून आपण चित्रीकरण करत असल्याचे खारे याने पोलिसांना सांगितल्याचे फिर्यादीत नमूद आहे. पोलिसांनी ड्रोन खाली उतरवून दोन पंचांच्या उपस्थितीत तो आणि त्याचा रिमोट कंट्रोलर जप्त केला. परवानगीसंबंधी कागदपत्रे सादर करण्यास वारंवार सांगूनही ती सादर करण्यात आली नसल्याचे पोलिसांनी म्हटले आहे.

याप्रकरणी पोलीस हवालदार युवराज टेळे यांनी दिलेल्या फिर्यादीवरून भारतीय न्याय संहितेच्या कलम २२३ अन्वये गुन्हा दाखल करण्यात आला आहे. महिला पोलीस उपनिरीक्षक शोभा तेली तपास करीत आहेत.

Sanjay Raut : पुढील सहा महिन्यांत सरकार कोसळणार? बड्या नेत्याच्या दाव्याने खळबळ

Dhruv Rathee : मोठी घडामोड! ध्रुव राठीला दिल्ली पोलिसांनी घेतलं ताब्यात; CJP कडून पोस्ट, जंतर मंतरवरही धरपकड