Pune MPSC Protest : MPSC विद्यार्थ्यांच्या आंदोलनात मोठी घडामोड! तिघांनी उपोषण सोडलं; धक्कादायक कारण समोर
Pune MPSC Protest : या आंदोलनाबाबत एक महत्त्वाची घडामोड समोर आली आहे. उपोषणाला बसलेल्या सात विद्यार्थ्यांपैकी तिघांनी मध्यरात्री उपोषण सोडले आहे.
पुणे : पुण्यातील एस. एम. जोशी पुलावर महाराष्ट्र लोकसेवा आयोगाच्या (MPSC) अध्यक्षांच्या राजीनाम्याच्या प्रमुख मागणीसह विविध मागण्यांसाठी विद्यार्थ्यांचे आंदोलन सुरू आहे. या आंदोलनाला राष्ट्रवादी काँग्रेसच्या शरद पवार गटाचे आमदार रोहित पवार यांनी पाठिंबा दिला असून, ते स्वतःही आंदोलनात सहभागी झाले आहेत.
अशातच या आंदोलनाबाबत एक महत्त्वाची घडामोड समोर आली आहे. उपोषणाला बसलेल्या सात विद्यार्थ्यांपैकी तिघांनी मध्यरात्री उपोषण सोडले आहे. आमदार रोहित पवार यांनी सोशल मीडियावर पोस्ट करत याबाबत माहिती दिली. सोमनाथ चव्हाण, ऋषिकेश गांगुर्डे आणि गजानन शेळके या तीन विद्यार्थ्यांनी काँग्रेसचे आमदार विश्वजित कदम यांच्या हस्ते दूध घेऊन उपोषणाची सांगता केली.
प्रकृती खालावल्याने उपोषण सोडण्याचा निर्णय
आंदोलनात सहभागी असलेल्या काही विद्यार्थ्यांची प्रकृती खालावल्याने त्यांना उपोषण मागे घ्यावे लागल्याचे रोहित पवार यांनी सांगितले. उपोषण सुरू ठेवल्यास तिघांच्या किडनीवर परिणाम होण्याचा धोका निर्माण झाल्याचेही सांगण्यात आले आहे. त्यामुळे या विद्यार्थ्यांनी उपोषण सोडण्याचा निर्णय घेतला. मात्र, आंदोलनातील उर्वरित चार विद्यार्थ्यांचे उपोषण सुरूच राहणार आहे.
#MPSC चे भ्रष्ट अध्यक्ष विवेक भिमनवार यांच्या राजीनाम्यासाठी पुण्यात सुरु असलेल्या #MPSC च्या विद्यार्थ्यांच्या सत्याग्रहामध्ये काही विद्यार्थी हे उपोषणाला बसले आहेत. त्यातील काहींची तब्येत खालावल्याने आणि आंदोलनाला पाठिंबा देणाऱ्या ज्येष्ठ मंडळींच्या आवाहनानुसार सोमनाथ चव्हाण, ऋषिकेश गांगुर्डे आणि गजानन शेळके यांनी उपोषण सोडले. विराज शिंदे या चिमुकल्याच्या आणि आ. विश्वजित जी कदम यांच्याहस्ते दूध घेऊन त्यांनी उपोषणाची सांगता केली पण #MPSC चे भ्रष्ट अध्यक्ष विवेक भिमनवार यांची विकेट घेतल्याशिवाय आंदोलनाची सांगता होणार नाही, हा सर्वांचा निर्धार मात्र कायम आहे..!
#MPSC_विद्यार्थी_सत्याग्रह #PuneProtest
#भिमनवारांचा_राजीनामा_झालाच_पाहिजे #MPSCStudentsProtest— Rohit Pawar (@RRPSpeaks) October 9, 2026
अध्यक्षांच्या राजीनाम्याच्या मागणीवर आंदोलनकर्ते ठाम
MPSC अध्यक्ष विवेक भीमनवार यांच्या राजीनाम्याच्या मागणीवर आंदोलनकर्ते ठाम आहेत. अध्यक्षांचा राजीनामा घेतल्याशिवाय आंदोलन मागे घेणार नसल्याची भूमिका रोहित पवार यांनी घेतली आहे. विद्यार्थ्यांच्या विविध मागण्यांसाठी सुरू असलेल्या या आंदोलनाला राजकीय नेत्यांनी हजेरी लावून पाठिंबा जाहीर केला आहे.
मुख्यमंत्र्यांसोबतच्या बैठकीनंतरही आंदोलन सुरू
MPSC विद्यार्थ्यांनी २ ऑक्टोबरपासून आंदोलन करण्याचा इशारा दिला होता. त्यापूर्वी ३० सप्टेंबर रोजी मुख्यमंत्री आणि विद्यार्थी प्रतिनिधींमध्ये बैठक झाली होती. या बैठकीत विद्यार्थ्यांच्या बहुतांश मागण्या मान्य झाल्याचा दावा करण्यात आला. मात्र, आयोगाच्या अध्यक्षांच्या राजीनाम्याची मागणी मान्य न झाल्याने आंदोलनकर्त्यांनी आपली भूमिका कायम ठेवली आहे. दरम्यान, तीन विद्यार्थ्यांनी उपोषण सोडले असले, तरी उर्वरित विद्यार्थ्यांचे आंदोलन सुरूच असल्याने पुढे काय घडणार, याकडे सर्वांचे लक्ष लागले आहे.
