Pune Gramin : शरदवाडी (ता.शिरूर) येथील जोरीलवण परिसरात रात्रीच्या अंधाराचा फायदा घेत अज्ञात चोरट्यांनी चोरी करून रोख स्वरूपातील काही रक्कम व वस्तू चोरून नेण्याची घटना शुक्रवारी (दि. १२) रोजी पहाटे एक वाजेच्या सुमारास घडली.

जोरीलवण येथील पारूबाई दौलत मेरगळ यांचे बंद घराचा दरवाजा तोडून २० हजार रुपये रक्कम व घरातील काही लग्न आहेराच्या महत्वाच्या वस्तूंची चोरी करून चोरट्यांनी पोबारा केला.

यावेळ चोरट्यांनी आजूबाजूच्या घरांच्या कड्या लावत शेजारी राहणारे अरुण धोंडिभाऊ जोरी यांचे घराची खिडकी तोडून आत प्रवेश करण्याचा प्रयत्न केला मात्र सदरची खोली ही धान्यांची असल्याने चोरट्यांना आत प्रवेश करणे शक्य झाले नाही.

मात्र, घडत असलेल्या या घटनांमुळे परिसरात भीतीचे वातावरण निर्माण झाले आहे. या घटनेचा योग्य तपास करून चोरट्यांना जेरबंद करावे अशी मागणी शिरूर तालुका कुस्तीगीर संघाचे उपाध्यक्ष पैलवान प्रशांत जोरी यांनी केली आहे.   (Pune Gramin)

सध्या पावसाळ्याचा ऋतू सुरू झाला असला तरीही पाऊस लांबणीवर गेला आहे त्यातच शिरूर तालुक्याच्या पश्चिम भागात जांबूत, शरदवाडी, फाकटे, वडनेर खुर्द , टाकळी हाजी या परिसराला रात्रीच्या वेळी मोठ्या प्रमाणात भारानियमनाचा सामना करावा लागत असून रात्रीच्या वेळी या भागातील नागरिक हे अंधारात जीवन जगत असल्याचे दिसून येते.

मात्र अद्यापही यावर रात्रीचे भारनियमन बंद करण्यास्तही कोणतीही ठोस उपाययोजना झाली नसून वाढू लागेल्या चोरीच्या घटनामुळे महिलांसह नागरिकांमध्ये भीतीचे वातावरण निर्माण झाले आहे.

तसेच विजेचा प्रश्न मार्गी लागणे गरजेचे असून रात्रीच्या वेळी या भागात पोलिसांकडून गस्त घालण्यात यावी अशी देखील मागणी प्रशांत जोरी यांनी केली आहे.