पुणे – विद्यार्थांसाठी खेळ हा आनंदाचा क्षण असतो. स्पर्धेत सहभागी विद्यार्थी, संघांनी यश प्राप्त करून संधीचे सोने करावे. अपयशाने खचून न जाता काय चुकले हे शिकून पुढील स्पर्धेसाठी तयार व्हावे, असे आवाहन जिल्हा परिषदेचे मुख्य कार्यकारी अधिकारी रमेश चव्हाण यांनी केले.

पुणे जिल्हा परिषदेच्यावतीने श्री छत्रपती शिवाजी क्रीडा संकुल, बालेवाडी येथे आयोजित यशवंतराव चव्हाण कला, क्रीडा व सांस्कृतिक जिल्हास्तरीय स्पर्धा २०२३-२४ चे उद्घाटन मुख्य कार्यकारी अधिकारी चव्हाण यांच्या हस्ते करण्यात आले. त्यावेळी ते बोलत होते. कार्यक्रमाला अतिरिक्त मुख्य कार्यकारी अधिकारी चंद्रकांत वाघमारे, जिल्हा ग्रामीण विकास यंत्रणेच्या प्रकल्प संचालक शालिनी कडू, शिक्षण उपसंचालक महेश पालकर, शिक्षणाधिकारी कमलाकांत म्हेत्रे, संध्या गायकवाड, आंतरराष्ट्रीय खेळाडू सचिन नवले, पंचायत समितीचे गट शिक्षणाधिकारी, विस्तार अधिकारी, स्पर्धेत सहभागी शाळांचे शिक्षक आदी उपस्थित होते.

यावेळी पालकर म्हणाले, विद्यार्थ्यांचा अभ्यासातील थकवा, ताण हा खेळ, सांस्कृतिक कार्यक्रमाच्या माध्यमातून दूर होण्यास मदत होते. ग्रामीण भागातील मुले अत्यंत चपळ, काटक असतात. त्यांच्या जिद्दिने, कौशल्याने ते पुढे येत असतात. कौशल्य सिद्ध करण्यासाठी विद्यार्थ्यांनी प्रयत्न करावेत. राज्यस्तरावर चमकणाऱ्या संघाला, विद्यार्थ्यांना क्रीडा प्रबोधनीत विविध खेळांच्या प्रशिक्षणासाठी प्रवेश दिले जातात. त्याचा विद्यार्थ्यांनी लाभ घ्यावा. या स्पर्धेत तालुकास्तरावरील प्रथम, द्वितीय व तृतीय क्रमांक विजेते संघ सहभागी होत आहेत. स्पर्धेत एकूण ३ हजार ७३४ विद्यार्थी सहभागी झाले आहेत.