प्रभात वृत्तसेवा
पुणे – खडक पोलीस स्टेशनच्या गुन्हे प्रतिबंधक पथकाने धाडसी कारवाई करीत रेकॉर्डवरील सराईत गुन्हेगार अथर्व ऊर्फ आप्पा उमाकांत सणस(२३, रा. गुरुवार पेठ, पुणे) याला दोन गावठी पिस्तूल व २२ जिवंत काडतुसांसह जेरबंद केले आहे. जप्त केलेल्या मुद्देमालाची एकूण किंमत १ लाख २ हजार रुपये इतकी आहे. ही कारवाई गुरुवार पेठेतील शीतळा देवी चौक परिसरात करण्यात आली. आरोपी अथर्व ऊर्फ आप्पा सणस हा भाजीपाला विक्रीचा व्यवसाय करतो. मात्र, त्याच्यावर पूर्वीपासून गंभीर गुन्ह्यांची नोंद आहे.

पोलिसांनी सांगितले की, खडक पोलीस ठाण्याच्या हद्दीत पेट्रोलिंगदरम्यान पोलीस हवालदार हर्षल दुडम यांना खबर मिळाली की, सराईत गुन्हेगार अथर्व सणस हा पिस्तुलासह शितळा देवी चौक येथे थांबला आहे. तत्काळ तपास पथकाने शीतळा देवी चौक येथे सापळा रचला. त्यावेळी अथर्व सणस पळून जाण्याचा प्रयत्न करीत असताना पथकाने शिताफीने पाठलाग करून त्याला पकडले.

अंगझडतीदरम्यान त्याच्या कंबरेतून एक गावठी पिस्तूल, मॅगझीन व २२ जिवंत काडतुसे मिळून आली. त्याने कबुली दिल्यानंतर आणखी एक गावठी पिस्तूल जवळील वाड्यात विटांच्या ठिगाऱ्याखाली लपवलेले मिळाले. त्याच्या विरुद्ध खडक पोलीस ठाण्यात आर्म ॲक्टनुसार गुन्हा दाखल करण्यात आला आहे.ही कारवाई अपर पोलीस आयुक्त (पश्चिम) राजेश बनसोडे, उप-आयुक्त (परिमंडळ १) कृषीकेश रावले, तसेच सहायक पोलीस आयुक्त अनघा देशमाने यांच्या मार्गदर्शनाखाली करण्यात आली.