Pune Crime – विमानाने बँकॉकहून पुण्यात आलेल्या प्रवाशाने खेळण्यांच्या बॉक्समध्ये लपवलेला तब्बल ५ कोटी ४२ लाखांचा हायड्रोपोनिक गांजा पुणे विमानतळावरील कस्टम (सीमाशुल्क) विभागाने जप्त केला. याप्रकरणी प्रवाशाला अटक केली आहे.परदेशातून देशाच्या विविध भागात प्रवास करणार्या तस्करांकडून वारंवार ड्रग्जची वाहतूक केली जाते. त्यापार्श्वभूमीवर तस्करांना पकडण्यासाठी कस्टमकडून सातत्याने कारवाई केली जाते. बुधवारी (दि. ११) एअर इंडिया एक्स्प्रेसच्या आयएक्स २४१ विमानातून हा प्रवासी विमानतळावर उतरला होता. त्याच्या हालचाली संशयास्पद दिसल्याने साहित्याची तपासणी केली. त्यावेळी पारदर्शक पाकिटांमध्ये हायड्रोपोनिक गांजा आढळून आला. संबंधित पाकिटे कार्बन पेपरमध्ये गुंडाळून पाच खेळण्यांच्या बॉक्समध्ये गांजा लपवून ठेवला होता. गांजाचे वजन ५ हजार ४२९ ग्रॅम असून त्याची आंतरराष्ट्रीय बाजारात ५ कोटी ४२ लाख एवढी किंमत आहे. याबाबत आरोपीने उडवाउडवीची उत्तरे दिली. त्याने गांजा कोठून आणला, तो कोणाला विक्री करणार होता, याचा तपास करण्यात येत आहे. ड्रग्ज रॅकेटमागील इतरांचा शोध घेतला सुरू आहे.
