Pune Crime : एमराल्ड हॉलचे केटरिंग व इव्हेंट मॅनेजमेंटचे कंत्राट कायम ठेवण्यासाठी तब्बल 60 लाख रुपयांची खंडणी मागून धमकावल्याप्रकरणी पुण्यातील एका सहकारी पतसंस्थेच्या पदाधिकाऱ्यांसह सात जणांविरुद्ध विश्रामबाग पोलिस ठाण्यात गुन्हा दाखल करण्यात आला आहे.

तक्रारदाराकडून 37.50 लाख रुपये रोख स्वरूपात उकळल्याचा तसेच 2021 ते 2025 या कालावधीत विविध कारणांनी सुमारे 99.46 लाख रुपये बेकायदेशीररीत्या घेतल्याचा आरोप तक्रारीत करण्यात आला आहे.

याप्रकरणी गणेश रत्नाकर भोज, नागेश खाशाबा नलावडे, उमाकांत रामचंद्र वालगुडे, दिपक केशवराव धुमाळ, दिनेश अरुण खोडके, राजन शंकर कामठे आणि नितीन हरिभाऊ वाघमारे यांच्याविरुद्ध गुन्हा दाखल करण्यात आला आहे.

तक्रारदार अजय सयाजीराव देसाई (वय 59) हे केटरिंग व इव्हेंट व्यवसाय करतात. त्यांच्या तक्रारीनुसार, म्हाळुंगे येथील एमराल्ड हॉल चालविण्याचा करार त्यांनी संबंधित पतसंस्थेशी केला होता.

हॉलचे नूतनीकरण, मार्केटिंग आणि व्यवस्थापन स्वतःच्या खर्चाने केल्यानंतर व्यवसायाला मोठी चालना मिळाली. त्यानंतर आरोपींनी सुरुवातीला विविध टक्केवारीने कमिशन आणि रोख रकमेची मागणी सुरू केली.   (Pune Crime)

तक्रारीनुसार, डिसेंबर 2023 पासून आरोपींनी दरवर्षी मोठी आगाऊ रक्कम आणि व्यवसायातील टक्केवारीची मागणी केली. एप्रिल 2024 मध्ये “दुसऱ्या केटरर्सला काम देतो” अशी धमकी देत 60 लाख रुपयांची खंडणी मागितली.

त्यानुसार तक्रारदाराने 5 एप्रिल 2024 रोजी 15 लाख, 6 एप्रिल रोजी 10 लाख आणि 7 जुलै 2024 रोजी 12.50 लाख रुपये रोख स्वरूपात दिल्याचा दावा केला आहे.

तक्रारदाराने आरोप केला आहे की, मागणीनुसार संपूर्ण रक्कम न दिल्याने वैध करार अस्तित्वात असतानाही त्यांचा व्यवसाय अडचणीत आणण्यात आला, दुसऱ्या केटरर्सना काम देण्याचा प्रयत्न करण्यात आला आणि सातत्याने धमक्या देण्यात आल्या.
तक्रारीत या व्यवहारांचे ऑडिओ रेकॉर्डिंग, कॉल रेकॉर्डिंग तसेच काही आर्थिक व्यवहारांचे पुरावे असल्याचा उल्लेख करण्यात आला आहे.

विश्रामबाग पोलिसांनी अर्जावरील चौकशी पूर्ण करून वरिष्ठांच्या परवानगीनंतर संबंधित सात जणांविरुद्ध गुन्हा दाखल केला असून, सहाय्यक पोलिस निरीक्षक किरण कारके पुढील तपास करत आहेत.