Pune Beed Express- हडपसर-घोरपडी दरम्यान तिसऱ्या रेल्वे लाइनच्या कामासाठी पुणे आणि हडपसर यार्डात मेगा ब्लॉक घेण्यात येत आहे. ब्लॉकच्या पहिल्या दिवशी (दि. ३) सोलापूर-सीएसएमटी, पुणे-नागपूर, पुणे-सोलापूर-पुणे, नागपूर-पुणे, अमरावती-पुणे यासह आठ दिवसांपूवीच सुरू झालेली पुणे-बीड-पुणे एक्स्प्रेसही रद्द करण्यात आली आहे. पुणे-बारामती आणि पुणे-दौंड दरम्यानच्या लोकल डेमू गाड्याही बंद राहणार आहेत.

चेन्नई-एलटीटी आणि त्रिवेंद्रम-एलटीटी या गाड्या सोलापूर-दौंड-अहिल्यानगर-मनमाड-कल्याण मार्गे धावतील. तसेच, पुणे-हावडा-पुणे दुरंतो एक्सप्रेस लोणावळा-पनवेल-कल्याण मार्गे धावणार असून या सर्व गाड्या पुण्यात येणार नाहीत. गोवा एक्स्प्रेस आणि चंदीगड-यशवंतपूर या गाड्या मनमाड-काष्टी-दौंड-कुर्डूवाडी-पंढरपूर-मिरज मार्गे वळवण्यात आल्या आहेत. इंदूर-दौंड आणि जयपूर-पुणे या गाड्या पुणे ऐवजी खडकी येथेच थांबतील. तसेच, जोधपूर-हडपसर-जोधपूर ही गाडी हडपसरऐवजी खडकी स्थानकावरूनच धावेल.

सातारा-दादर एक्स्प्रेस दुपारी साडेतीन ऐवजी रात्री १०:३० वाजता ७ तास उशिराने साताऱ्याहून सुटेल व मिरज, कुर्डूवाडी ऐवजी जेजुरी-पुणे मार्गे जाईल. यामध्ये प्रवाशांना दिलासादायक म्हणजे झेलम एक्स्प्रेस आणि आझाद हिंद एक्स्प्रेस दि. ३ ऑक्टोबरला त्यांच्या नियमित वेळेनुसारच सुटतील. तसेच या दिवशी प्रवासासाठी तिकीट बुक केलेल्या प्रवाशांना रेल्वेकडून पूर्ण परतावा दिला जाईल.

ब्लाॅकच्या दुसऱ्या दिवशी रविवारी (दि. ४) इंद्रायणी, डेक्कन, इंटरसिटी, कोयना, हुतात्मा एक्सप्रेसह पुणे-नागपूर, सीएसएमटी-सोलापूर आणि पुणे-शिर्डी या गाड्या रद्द राहतील. तसेच, पुणे-लोणावळा लोकल आणि सातारा/दौंड डेमू गाड्याही बंद राहतील. जोधपूर-हडपसर गाडी खडकीतच थांबेल. दौंड-इंदूर आणि पुणे-जयपूर पुणे ऐवजी खडकीवरून सुटतील.

पुणे-हतिया आणि पुणे-रानी कमलापती या गाड्या पुणे ऐवजी थेट दौंडवरून सुटतील. तळेगाव लोकल शिवाजीनगर स्थानकावरच थांबेल. कोल्हापूर-पुणे एक्स्प्रेस जेजुरीपर्यंत, तर हुबळी-पुणे गाडी सातारा स्थानकापर्यंतच धावेल. एलटीटी-विशाखापट्टणम गाडी मनमाड-दौंड मार्गे वळवल्याने पुण्यात येणार नाही.