Pune Auto Rickshaw – प्रवाशांशी संवाद सोपा, सुलभ आणि आदराचा व्हावा यासाठी पुणे प्रादेशिक परिवहन विभागाने (आरटीओ) बिगरमराठी रिक्षाचालकांसाठी मराठी भाषेचे विशेष प्रशिक्षण मोहीम सुरू सुरू केली आहे. आतापर्यंत ३० पैकी २६ चालक यात उत्तीर्ण झाले असून, शासनाच्या नियमांनुसार हे प्रशिक्षण पूर्ण करण्यासाठी १५ ऑगस्ट २०२६ ही अंतिम मुदत आहे. १६ ऑगस्टपासून परिवहन विभागातर्फे कडक तपासणी मोहीम राबवली जाणार असून,

ज्यांच्याकडे अधिकृत प्रमाणपत्र नसेल, त्यांच्यावर कारवाई केली जाईल. वेळप्रसंगी त्यांचे परवाने निलंबित होतील. मोहिमेला गती देण्यासाठी आरटीओने शहरातील प्रमुख रिक्षा संघटनांची तातडीची बैठक बोलावून सर्व चालकांना यात सहभागी होण्याचे आवाहन केले. आपापल्या भागातील सर्व बिगरमराठी रिक्षाचालकांना प्रशिक्षणात तातडीने सामील करून घ्यावे, असे निर्देश आरटीओने दिले आहेत.

बिगरमराठी रिक्षाचालकांची कामाची वेळ आणि रोजीरोटी लक्षात घेऊन आरटीओने प्रशिक्षणाचे स्वरूप अत्यंत सोपे आणि सुटसुटीत ठेवले आहे. पुणे आरटीओ कार्यालयात कार्यालयीन वेळेत दररोज एक तासाचे विशेष सत्र घेतले जाते. या सत्रात चालकांना प्रवाशांशी संवाद कसा साधावा, पत्ता कसा विचारावा, भाड्याचे पैशांचे व्यवहार कसे करावेत आणि ग्राहकांशी नम्रतेने कसे बोलावे, याचे धडे दिले जात आहेत.

प्रत्यक्ष वर्गाव्यतिरिक्त चालकांना घरी सराव करता यावा, यासाठी आरटीओकडून एक मोफत ई-पुस्तिकाही दिली आहे. प्रशिक्षणासाठी १५ ऑगस्टपर्यंतची मुदत दिली असून, १६ ऑगस्टपासून आरटीओ विशेष मोहीम राबवणार आहे. बिगरमराठी रिक्षाचालकाकडे मराठी भाषा संवाद पाठ्यक्रमाचे अधिकृत प्रमाणपत्र नसल्यास दंडात्मक कारवाई केली जाईल, असे आरटीओ प्रशासनाने सांगितले.