Indapur News – इंदापूरकरांनो विकासाची अजिबात काळजी करू नका. इंदापूर शहराचे श्रद्धास्थान असलेल्या श्री वेंकटेश (बालाजी) मंदिराचा विकास कोणत्याही परिस्थितीत अपूर्ण राहू दिला जाणार नाही. मंदिराचे काम दर्जेदार, भव्य आणि भाविकांसाठी आदर्श ठरेल, यासाठी राज्य शासनाकडून आवश्यक तो सर्व निधी उपलब्ध करून दिला जाईल. यापूर्वी मंजूर केलेल्या २ कोटी रुपयांव्यतिरिक्त आणखी २ कोटी रुपयांचा निधी लवकरच दिला जाईल,

अशी ठाम ग्वाही राज्याचे कृषिमंत्री दत्तात्रय भरणे यांनी दिली. या वेळी बोलताना कृषिमंत्री भरणे म्हणाले की, इंदापूर शहरासह संपूर्ण तालुक्यात या मंदिराविषयी अपार श्रद्धा आहे. हजारो भाविकांना दूरवर जाण्याची गरज भासू नये, यासाठी इंदापुरातच सुसज्ज आणि सर्व सुविधांनी युक्त मंदिर उभारण्याचा संकल्प आहे. नगरसेविका मयुरी उंबरे आणि प्रशांत उंबरे यांच्या मागणीचा सकारात्मक विचार करून अतिरिक्त २ कोटी रुपयांचा निधी देण्याची घोषणा त्यांनी या वेळी केली.

तसेच मंदिराचे काम गुणवत्तापूर्ण आणि इंदापूरच्या वैभवात भर घालणारे असावे, असे आवाहनही त्यांनी केले. नगराध्यक्ष भरत शहा यांनी कृषिमंत्री भरणे यांच्या विकासदृष्टिकोनाचे कौतुक केले. “शासनाकडून मिळणाऱ्या एकूण ४ कोटी रुपयांच्या निधीमुळे मंदिराचा सर्वांगीण जीर्णोद्धार होणार असून यामुळे इंदापूरच्या धार्मिक व सांस्कृतिक वैभवात मोठी भर पडेल,” असे सांगत त्यांनी कृषिमंत्र्यांचे आभार मानले.

या विकास प्रकल्पामुळे इंदापूरच्या धार्मिक पर्यटनाला चालना मिळून शहराच्या विकासाला नवी दिशा मिळेल, अशी भावना उपस्थितांनी व्यक्त केली. कार्यक्रमाचे स्वागत ‘प्रशांत मामा युवा मंच’चे प्रमुख प्रशांत उंबरे यांनी केले, तर आभार नगरसेविका मयुरी उंबरे यांनी मानले. शहरातील श्री वेंकटेश मंदिराच्या विकासकामांचा शुभारंभ रविवारी (दि. २६) कृषिमंत्री भरणे यांच्या हस्ते संपन्न झाला. या प्रसंगी नगराध्यक्ष भरत शहा, राष्ट्रवादी काँग्रेसचे गटनेते शकील सय्यद, मुख्याधिकारी रमेश ढगे, माजी नगराध्यक्ष अशोक इजगुडे, नगरसेविका मयुरी उंबरे, मंदिराचे भक्तगण आणि शहरातील नागरिक मोठ्या संख्येने उपस्थित होते.