Pune : थंडीमुळे हवा प्रदूषण पातळीत झाली वाढ

पुणे – थंडीमुळे हवेच्या प्रदूषणाची पातळी वाढली असून, धुलीकण हवेतच स्थिर राहिल्याने श्वसनासंबंधीच्या तक्रारी वाढल्या आहेत. दम्याच्या रुग्णांचाही त्रास वाढला आहे.

गेल्या दोन-तीन दिवसांपासून थंडीची चाहूल लागली असून, पहाटे धुके दाटत आहे. त्यामध्ये धुराचे प्रमाण दिसत असल्याने सकाळी हवेत धुरकटपणा दिसून येत आहे. दवांबरोबरच्या धुलीकणांमुळे हवा प्रदूषण निर्माण होत आहे. हे धुलीकण हवेतच अडकून राहात असल्याने हे प्रदूषण जास्त होते.

याशिवाय विद्यापीठ चौक, आळंदी, निगडी आणि भोसरी या भागांत प्रदूषणाचे प्रमाण वाढले आहे. त्यामुळे श्वसनाचे विकार वाढले असून, खोकला, दमा या तक्रारी असलेल्या रुग्णांची संख्या वाढली आहे. त्यातून ऋतू संक्रमणामुळेही आरोग्यावर परिणाम होत आहे. सर्दी, खोकला, संधिवात असलेल्या रुग्णांचे प्रमाणही वाढले आहे. दरम्यान, थंडीचा जोर आणखी वाढणार असून, श्वसनविकार असलेल्या रुग्णांनी काळजी घ्यावी, असे आवाहन तज्ज्ञ डॉक्टरांनी केले आहे.