priya marathe : मराठी-हिंदी मालिकांमधून लोकप्रिय ठरलेली अभिनेत्री प्रिया मराठे हिचं ३८व्या वर्षी कॅन्सरशी झुंज देत निधन झालं. तिच्या निधनानंतर अनेक कलाकारांनी दुःख व्यक्त केलं आहे. अभिनेत्री मुग्धा गोडबोले-रानडे हिने सोशल मीडियावर पोस्ट लिहून प्रियाच्या आयुष्यात घडलेल्या काही आठवणी सांगितल्या आणि नेटिझन्सच्या वागणुकीबद्दल ती खूप अस्वस्थ असल्याचं व्यक्त केलं.

मुग्धाने लिहिलं की, “जुलै २०२३ मध्ये प्रियाने इन्स्टाग्रामवर एक व्हिडिओ शेअर केला होता. त्यात तिने प्रकृतीमुळे मालिकेतून बाहेर पडत असल्याचं सांगितलं होतं. चॅनेलनेही तो व्हिडिओ पोस्ट केला होता. प्रियाला कॅन्सर झाला होता आणि ती उपचार घेत असतानाही काही काळ शूटिंग करत होती. मात्र, थकवा जाणवत असल्याने तिला ब्रेक घ्यावा लागला. त्या मालिकेत ती निगेटिव्ह भूमिका करत होती. त्याच्यामुळे असेल कदाचित, पण त्या व्हिडिओखाली लोकांनी फार वाईट, अश्लील कमेंट्स लिहिल्या. काय वाटलं असेल तिला?”

ती पुढे म्हणाली, “प्रिया गेली… दोन वर्षं कॅन्सरशी लढली आणि शेवटी हरली. हे खूपच दुःखद आहे. फार कमी गोष्टींनी मी इतकी अस्वस्थ होते, पण प्रिया खूप गोड आणि सज्जन मुलगी होती. पुन्हा पुन्हा तोच प्रश्न पडतो, लोक एखाद्या कलाकाराबद्दल इतकं वाईट का लिहितात? कलाकाराचं काम आणि त्याची प्रतिमा यातला फरक प्रेक्षकांना आता समजत नाही का? सोशल मीडियावर एकाने वाईट लिहिलं की सगळे त्यात सामील होतात. हे विषासारखं पसरतं.”

शेवटी मुग्धाने लिहिलं, “प्रियाचं निधन ही फारच दुर्दैवी घटना आहे. समाज म्हणून आपण काय गमावतोय याचा विचार करायला हवा.”

दरम्यान, अभिनेत्री नीना कुळकर्णी यांसह अनेक कलाकारांनी प्रियाच्या अकाली जाण्याबद्दल दुःख व्यक्त केलं आहे.