बंगुळूरू – बलात्कार आणि लैंगिक शोषण प्रकरणातील आरोपी प्रज्वल रेवण्णाला १४ दिवसांची न्यायालयीन कोठडी सुनावण्यात आली आहे. तसेच त्याची रवानगी २४ जूनपर्यंत बंगळुरू सेंट्रल तुरुंगात करण्यात आली आहे.

कर्नाटकमधील सेक्स टेप प्रकरणात रेवण्णावर बलात्काराचे तीन गुन्हे दाखल करण्यात आले आहेत. त्यापैकी एका प्रकरणात ही कोठडी सुनावण्यात आली आहे. महत्त्वाचे म्हणजे इतर दोन प्रकरणात रेवण्णाने अंतरिम जामिनासाठी अर्ज केला आहे. मात्र, दोन्ही प्रकरणावरील सुनावणी अद्याप बाकी आहे.

जवळपास महिन्याभरापूर्वी कर्नाटकमधील मतदानानंतर हे प्रकरण उघडकीस आले होते. प्रज्वल रेवण्णावर महिलांचे लैंगिक शोषण केल्याचा आरोप करण्यात आला होता. त्याचे व्हिडीओदेखील व्‍हायरल झाले होते. प्रज्वल रेवण्णाच्या ड्रायव्हरनेच या सगळ्या क्लिप असणारा पेनड्राईव्ह पोलिसांच्या हवाली केला होता.

हे प्रकरण प्रकरण देशभरात पसरल्यानंतर कर्नाटक सरकारने याच्या तपासासाठी एसआयटी स्थापन केली होती. तसेच त्याच्या विरोधात गुन्हादेखील दाखल करण्यात आला होता.

दरम्यान, हे प्रकरण उजेडात आल्यानंतर काही दिवसांनी आपण भारतात परतणार असून स्वत:ला पोलिसांच्या स्वाधीन करणार असल्याचा व्हिडीओ रेवण्णाने प्रसिद्ध केला होता.

त्यानुसार ३१ मे रोजी तो बंगळुरूच्या केम्पेगौडा विमानतळावर दाखल झाला होता. त्यावेळी पोलिसांनी त्याला विमानतळावरूनच अटक केली होती. तसेच त्याला ६ जूनपर्यंत पोलीस कोठडी सुनावण्यात आली होती.