Pune news – ‘देवतारी त्याला कोण मारी’ अशी म्हण प्रचलित आहे. मात्र, दररोज देवाचे दर्शन घेतल्याशिवाय घरी न परतणाऱ्या एका तरुणाचा देवाच्या दारातच अपघाती मृत्यू झाला. दसऱ्याच्या रात्री शंकर महाराज मंदिरात दर्शन घेऊन भिक्षेकऱ्यांना दान देत असलेल्या तरुणाला भरधाव टेम्पोने पाठीमागून जोरदार धडक दिली. गंभीर जखमी झालेल्या तरुणाचा उपचारादरम्यान मृत्यू झाला.

घरापासून मंदिर अवघ्या दोन मिनिटांच्या अंतरावर असताना घडलेल्या या घटनेने होनकळसे कुटुंबावर दुःखाचा डोंगर कोसळला आहे. एकुलत्या एक मुलाच्या मृत्यूने वडिलांचा आधार हरपला असून, अपघातानंतर पोलिसांनी तातडीने रुग्णालयात नेण्याची व्यवस्था का ? केली नाही, असा सवालही त्यांनी उपस्थित केला आहे.

मयूर मनिष होनकळसे ( ३६, रा. पुण्याईनगर, बालाजीनगर) असे मृत तरुणाचे नाव आहे. मयूर हा पर्वती परिसरातील गजानन महाराज मठाजवळील एका हॉटेल रिलॅक्समध्ये हेड शेफ म्हणून काम करत होता. या प्रकरणी मयूरचे वडील मनिष होनकळसे यांनी सहकारनगर पोलीस ठाण्यात फिर्याद दिली आहे. त्यानुसार, टेम्पोचालकाविरुध्द गुन्हा दाखल करण्यात आला

मंदिरातून बाहेर पडताच काळाचा घाला

दसऱ्यानिमीत्त हॉटेलमधील साफसफाई करुन रात्री सव्वादोनच्या सुमारास मयूर शंकर महाराज मंदिरात दर्शन घेऊन बाहेर पडला. बाहेर बसलेल्या भिक्षेकऱ्यांना तो खाद्य पदार्थ देत होता. त्याचवेळी स्वारगेटकडून कात्रजच्या दिशेने जाणाऱ्या भरधाव टेम्पोने त्याला पाठीमागून जोरदार धडक दिली. या धडकेत मयूरच्या डोक्याला, हाताला आणि पायाला गंभीर दुखापत झाली. अपघातानंतर घटनास्थळी नागरिकांची गर्दी झाली. पोलिसही तेथे दाखल झाले.

मयूरच्या मोबाईलवरून त्याच्या आईला फोन करून अपघाताची माहिती देण्यात आली. मुलाला गंभीर दुखापत झाल्याचे समजताच आई-वडिलांनी शेजारी राहणाऱ्या श्रेयस शेट्टी यांच्यासह घटनास्थळी धाव घेतली. त्यावेळी मयूर रक्तबंबाळ अवस्थेत पडलेला होता. वडिलांनी त्याला तातडीने भारती रुग्णालयात दाखल केले. डॉक्टरांनी त्याला अतिदक्षता विभागात दाखल करून उपचार सुरू केले; मात्र, सुमारे तासाभराने त्याचा मृत्यू झाल्याचे डॉक्टरांनी सांगितले.

कामावरून सुटल्यानंतर मयूर नियमितपणे शंकर महाराज मंदिरात दर्शनासाठी जात असे. देवदर्शन करून घरी परतणे हा त्याच्या दिनक्रमाचा भाग होता. ज्या मंदिरात तो दररोज श्रद्धेने नतमस्तक व्हायचा, त्याच मंदिराच्या परिसरात त्याच्यावर काळाने घाला घातला. घर अवघ्या दोन मिनिटांच्या अंतरावर असतानाही मयूरला घरी परतता आले नाही, ही सल त्याच्या कुटुंबीयांना कायम बोचत राहणार आहे.