मुंबई : महाराष्ट्रातील स्थानिक स्वराज्य संस्थांच्या निवडणुकीची रणधुमाळी जोरात सुरू असताना, आज (२ डिसेंबर २०२५) २४२ नगरपालिका आणि ४६ नगरपंचायतींमध्ये मतदान पार पडले. मात्र, तांत्रिक अडचणी आणि न्यायालयीन प्रक्रियांमुळे २४ नगरपालिका व पंचायतींचे मतदान २० डिसेंबरला ढकलण्यात आले आहे. यामुळे सर्व निकाल आता एकत्रितपणे २१ डिसेंबरला जाहीर होणार आहेत, असा मोठा निर्णय मुंबई उच्च न्यायालयाच्या नागपूर खंडपीठाने घेतला आहे. या निर्णयामुळे उमेदवारांना १९ दिवस वाट पाहावी लागेल, तर आचारसंहिता २१ डिसेंबरपर्यंत कायम राहील. याचा परिणाम म्हणून जिल्हा परिषद (झेडपी) आणि पंचायत समितीच्या निवडणुका फेब्रुवारी महिन्यात ढकलल्या जाण्याची शक्यता वर्तवली जात आहे. नगरपालिका मतदानात गोंधळ; निकाल विलंबामुळे झेडपी निवडणुका लांबल्या आजच्या मतदानादरम्यान अनेक ठिकाणी मशीन बंद पडल्याने रांगा वाढल्या, तर उमेदवारांच्या कार्यकर्त्यांमध्ये बाचाबाची आणि जीवघेणे हल्ले झाले. काही केंद्रांवर तासन्तास विलंब झाल्याचा आरोप उमेदवारांनी केला आहे. मात्र, मतदानाची टक्केवारी चांगली असल्याचे निवडणूक आयोगाने सांगितले. निकाल विलंबामुळे राज्य निवडणूक आयोगाच्या यंत्रणेवर ताण वाढला असून, त्याचा थेट परिणाम झेडपी आणि पंचायत समितीच्या निवडणुकांवर होत आहे. सूत्रांनुसार, नगरपालिका निकालानंतर लगेच महापालिका निवडणुका घेण्याचे नियोजन आहे, ज्यामुळे झेडपी निवडणुका फेब्रुवारीत सरकतील. महापालिका निवडणुका जानेवारीत २०१७ पासून रखडलेल्या २९ महापालिकांच्या निवडणुकीला आता वेग आला आहे. सर्वोच्च न्यायालयाने ३१ जानेवारी २०२६ पर्यंत सर्व निवडणुका पूर्ण करण्याचे आदेश दिले असून, राज्य निवडणूक आयोगाने महापालिका आयुक्तांची ४ डिसेंबरला बैठक बोलावली आहे. हरकतींचे निरसन १० डिसेंबरपर्यंत होईल, आणि निवडणुका जानेवारी महिन्यात होण्याची शक्यता आहे. मुंबई महानगरपालिकेच्या निवडणुकीसाठी नव्या प्रभाग रचनेनुसार तयारी सुरू असून, चार सदस्यांच्या प्रभाग पद्धतीचा अवलंब करण्यात आला आहे. मात्र, आरक्षण मर्यादा ओलांडल्यामुळे काही जिल्ह्यांत अडचणी असल्याचे आयोगाने सुप्रीम कोर्टात सांगितले.
