PMC News- कायमच तक्रारींच्या पिंजऱ्यात असलेल्या कचरा, पाणीपुरवठा आणि आरोग्यसेवा विभागातील अधिकाऱ्यांना स्थायी समिती अध्यक्ष श्रीनाथ भिमाले यांनी गुरूवारी थेट जपानमधून आदेश दिले आहेत. भिमाले हे सध्या जपान दौऱ्यावर आहेत. महापालिकेत गुरूवारी झालेल्या स्थायी समितीच्या बैठकीत महापौर मंजुषा नागपुरे, समितीचे अध्यक्ष श्रीनाथ भिमाले, अतिरिक्त आयुक्त प्रजित नायर आणि शहर अभियंता अनिरुद्ध पावसकर यांनी जपान दौऱ्यावरून ऑनलाइन सहभाग घेतला.

समितीचे अन्य सदस्य आणि अधिकारी प्रत्यक्ष उपस्थित होते. शहरातील विविध भागांतील अस्वच्छता, साचलेला कचरा, विस्कळित पाणीपुरवठा आणि दूषित पाण्याच्या तक्रारींची समितीच्या बैठकीत दखल घेण्यात आली. वानवडी, जांभूळवाडी, वाघोली आणि कात्रज परिसरात नियमित स्वच्छता होत नसल्याच्या तक्रारी असून, संबंधित विभागांनी त्याकडे तातडीने लक्ष देऊन कार्यवाही करावी, अशा सूचना भिमाले यांनी दिल्या.

शहरातील काही भागांत पाणीपुरवठा सुरळीत होत नसल्याच्या तक्रारीही समितीच्या बैठकीत मांडण्यात आल्या. काही ठिकाणी पिण्याच्या पाण्यात दूषित पाणी मिसळत असल्याने नागरिकांच्या आरोग्याचा प्रश्न निर्माण झाला आहे. त्यामुळे संबंधित भागातील पाणीपुरवठ्याची व्यवस्था तपासून तो सुरळीत करण्याबरोबरच दूषित पाण्याच्या तक्रारींवर तातडीने उपाययोजना करण्याच्या सूचना देण्यात आल्या.

दरम्यान, वारंवार खंडित होणाऱ्या विद्युतपुरवठ्याचा परिणाम पाणीपुरवठ्यावर होत असल्याचेही बैठकीत निदर्शनास आले. काही भागांतील पाण्याच्या टाक्या पूर्ण क्षमतेने भरता येत नसल्याने नागरिकांना नियमित पाणीपुरवठा करण्यात अडचणी येत आहेत. विद्युत विभागाने याबाबत आवश्यक उपाययोजना कराव्यात, तसेच पाणीपुरवठा व्यवस्थेतील व्हॉल्व्हमनना आवश्यक प्रशिक्षण देण्यात यावे,

असे निर्देश देण्यात आले. बदलत्या हवामानामुळे ताप, थंडी, अंगदुखी, डेंग्यू, मलेरिया, स्वाइन फ्लू, सर्दी-खोकला आदी आजारांच्या रुग्णसंख्येत वाढ होत असल्याने महापालिकेच्या रुग्णालये आणि दवाखान्यांमध्ये रुग्णांना वेळेत उपचार मिळण्याची व्यवस्था करावी, औषधांचा पुरेसा साठा ठेवण्याचे आदेशही देण्यात आले.