PCMC Gym: महापालिकेच्या व्यायामशाळा खासगी संस्थांच्या घशात! ५१ व्यायामशाळांबाबत धक्कादायक खुलासा
PCMC Gym: पिंपरी-चिंचवड महापालिकेच्या ५१ व्यायामशाळा अकरा महिन्यांच्या करारावर खासगी संस्थांच्या ताब्यात; १० रुपयांऐवजी १ हजार रुपयांहून अधिक फी उकळल्याचा गंभीर आरोप.
PCMC Gym – महापालिकेने खेळाडू, विद्यार्थी, तसेच सामान्य नागरिकांच्या सदृढ आरोग्यासाठी व्यायामशाळा उभारल्या. परंतु, या व्यायामशाळा खासगी संस्था आणि मंडळांच्या घशात गेल्या आहेत. महापालिकेकडून संचलित व्यायामशाळांमध्ये अवघे १० रुपये मासिक शुल्क आकारले जाते. मात्र, खासगी संस्थांकडून याच जिममध्ये हजारो रुपये घेतले जातात.
पालिकेची जागा, पालिकेचेच साहित्य आणि वरून देखभालीसाठी पालिकेकडून आर्थिक अनुदान घेऊनही खासगी चालक मात्र सामान्य नागरिकांची लूट करीत आहेत. पिंपरी-चिंचवड शहरात महापालिकेच्या एकूण ८६ व्यायामशाळा आहेत, ज्यातील ५१ व्यायामशाळा अकरा महिन्यांच्या करारावर खासगी संस्था व मंडळांना चालवण्यासाठी देण्यात आल्या आहेत.
या संस्थांना पालिकेकडून मोफत मोक्याची जागा, जिमचे सर्व आधुनिक साहित्य आणि देखभालीसाठी दरमहा दोन हजार रुपयांचे आर्थिक सहाय्य दिले जाते. एवढे सर्व मिळूनही खासगी संस्थाचालकांनी या सार्वजनिक सेवांचे रूपांतर स्वतःच्या कमाईच्या धंद्यात केले आहे. दुसरीकडे, योग्य देखभाल आणि साहित्याअभावी अर्ध्याहून अधिक व्यायामशाळा तर थेट बंद पडल्या आहेत.
महापालिकेच्या क्रीडा धोरणानुसार, महापालिकेच्या व्यायामशाळेत येणाऱ्या नागरिकांकडून केवळ २० रुपये डिपॉझिट आणि दरमहा १० रुपये फी आकारणी केली जाते. तसेच या व्यायामशाळा सकाळी ६ ते रात्री ८ वाजेपर्यंत नागरिकांसाठी खुल्या असणे बंधनकारक आहे. मात्र, खासगी संस्थांनी घेतलेल्या व्यायामशाळांमध्ये नागरिकांकडून दरमहा १ हजार किंवा त्यापेक्षा जास्त शुल्क घेतले जाते.
पिंपरी-चिंचवड महापालिका.
इतकेच नव्हे तर, पालिकेच्या या व्यायामशाळांचा वापर जिम चालकांकडून इतर खासगी कार्यक्रमांसाठी केला जात असल्याच्या तक्रारी केल्या जातात. अनेक खासगी चालकांनी पालिकेच्या जागेवरच अनधिकृत बांधकामे करून अतिक्रमण केले आहे. तर बहुतांश ठिकाणी व्यायामाचे साहित्यच गायब अथवा नादुरुस्त अवस्थेत आहे.
लूट करणाऱ्या संस्थांचे करार रद्द करा
महापालिकेच्या मालमत्तेचा बेकायदेशीर वापर व सामान्य नागरिकांची आर्थिक लूट होत असतानाही महापालिकेचा क्रीडा विभाग याकडे साफ दुर्लक्ष करत आहे. काही खासगी संस्थांसाठी राजकीय पदाधिकारी व नगरसेवक वारंवार शिफारस करतात. त्यामुळे क्रीडा विभागाचे या खासगी चालकांशी साटेलोटे आहे की राजकीय दबावाखाली क्रीडा विभागाचा संपूर्ण कारभार सुरु आहे, असे प्रश्न उपस्थित होतात.
विभागाकडून नव्याने धोरण तयार करण्याचे काम सुरु आहे. यापूर्वीच्या धोरणात व्यायामशाळा चालविण्यास दिल्यानंतर खासगी संस्थांनी किती शुल्क आकारावे, याबाबत निश्चित काही नव्हते. या व्यतिरिक्त व्यायामशाळा चालविणाऱ्या संस्थांकडून करारनाम्यातील नियमांचे उल्लंघन होत असल्याची तक्रार प्राप्त झाल्यास योग्य कारवाई केली जाईल.
– पंकज पाटील, उपायुक्त, पिंपरी-चिंचवड महापालिका
