PMC News – पावसाळ्याच्या पार्श्वभूमीवर पुणे शहरात डेग्यू, मलेरिया अशा साथरोगांचा प्रादूर्भाव रोखण्यासाठी पुणे महापालिकेच्या आरोग्य विभागाने विविध उपाययोजना हाती घेतल्या आहेत. डासांची उत्पत्तीस्थळे शोधून ती नष्ट करावीत यासाठी औषधफवारणी करणे, नियमित सर्वेक्षण करणे, जोखमीच्या भागांची नोंद करून प्रतिबंधात्मक उपाययोजना राबविणे तसेच नागरिकांमध्ये जनजागृती करण्याच्या कडक सूचना क्षेत्रीय कार्यालयांना पालिका प्रशासनाने दिल्या आहेत.

पावसाळ्यात डासांची उत्पत्ती वाढून किटकजन्य आजारांचा धोका निर्माण होण्याची शक्यता लक्षात घेऊन औषधफवारणीच्या कामाला विशेष महत्त्व देण्यात आले आहे. यासाठी सर्व क्षेत्रीय कार्यालयांना औषधधूर फवारणीकरिता स्वतंत्र टेम्पो वाहन उपलब्ध करून देण्यात आले आहे. तसेच पारेषण काळाच्या पार्श्वभूमीवर अधिकचे कंत्राटी मनुष्यबळ पुरविण्यात आले असून, विशेषतः महापालिकेत नव्याने समाविष्ट झालेल्या गावांमध्ये कर्मचारी उपलब्ध करून देण्यात आले आहेत.

महापालिकेच्या विविध विभागांमध्ये समन्वय ठेवण्याच्या सूचनाही क्षेत्रीय कार्यालयांना देण्यात आल्या आहेत. अतिक्रमण, घनकचरा, मलनि:स्सारण, भवन आदी विभागांसह खासगी आणि अन्य शासकीय संस्थांशी नियमित समन्वय ठेवण्यावर भर देण्यात आला आहे. प्रत्येक क्षेत्रीय कार्यालयात किटकनाशक औषधांचा पुरेसा साठा ठेवण्याच्या सूचना आहेत.

“पावसाळ्यात साथरोगांची परिस्थिती नियंत्रणात ठेवण्यासाठी महापालिकेकडून पूर्वतयारी केली आहे. औषधधूर फवारणीसाठी प्रत्येक क्षेत्रीय कार्यालयाला स्वतंत्र टेम्पो वाहन दिले आहे. पारेषण काळासाठी अतिरिक्त कंत्राटी मनुष्यबळ उपलब्ध करून देण्यात आले आहे. नवीन समाविष्ट गावांमध्येही विशेष मनुष्यबळ दिलेले आहे.”
– डॉ. राजेंद्र दिघे, सहाय्यक आरोग्य अधिकारी, पुणे महापालिका