Pune Crime – महाराष्ट्र आणि मध्य प्रदेशात घरफोडीचे तब्बल १४ गुन्हे दाखल असलेल्या सराईत चोरट्याला पुणे ग्रामीण पोलिसांनी अमरावती जिल्ह्यातून अटक केली. दिपक भिमराव दांडगे ( २५, रा. जि. बैतूल, मध्य प्रदेश; सध्या, कविठा, ता. अचलपूर, जि. अमरावती) असे आरोपीचे नाव आहे. त्याच्याकडून शिक्रापूर व शिरूर परिसरातील तीन घरफोडीचे गुन्हे उघडकीस आणले असून,

१६ तोळे सोन्याचे दागिने, मोटारसायकल असा २४ लाख ३० हजारांचा मुद्देमाल जप्त केला आहे. शिक्रापूर, शिरूर परिसरात घरफोडीच्या घटना वाढल्याने पुणे ग्रामीणचे पोलीस अधीक्षक संदीप सिंह गिल्ल यांनी स्थानिक गुन्हे शाखा आणि संबंधित ठाण्यांना सूचना दिल्या होत्या. पोलिसांनी घटनास्थळे, गुन्ह्यांची वेळ आणि चोरट्यांची कार्यपद्धतीचा अभ्यास केला.

घटनास्थळांपासून रस्त्यालगतचे सीसीटीव्ही फुटेज तपासून तांत्रिक विश्लेषण केले. तपासादरम्यान आरोपी अमरावती जिल्ह्यातील कविठा येथे बहिणीकडे राहत असल्याची माहिती मिळाली. त्यानुसार स्थानिक गुन्हे शाखा आणि शिक्रापूर पोलिसांनी कविठा येथे दांडगे याला ताब्यात घेतले.ही कारवाई पोलीस निरीक्षक प्रमोद क्षीरसागर, शिक्रापूर पोलीस ठाण्याचे पोलीस निरीक्षक चंद्रशेखर यादव तसेच तपास पथकाने केली.