PMC News – महापालिकेकडून देण्यात येणाऱ्या बांधकाम परवानगी अधिकारात मोठे बदल करण्यात आले आहेत. तब्बल तीस वर्षांपासून सर्व प्रकारच्या बांधकामांचे अधिकार महापालिकेच्या उपअभियंत्यांकडे होते. मात्र, आता त्यांच्याकडे केवळ २००० चौ. मीटरपर्यंतच्या प्रस्तावांना मंजुरी देण्याचे अधिकार असणार आहेत. महापालिका आयुक्त नवल किशोर राम यांनी गुरुवारी याबाबतचे आदेश काढले आहेत. त्यात आता उपअभियंत्याच्या सोबतच कार्यकारी अभियंते आणि अधीक्षक अभियंत्यांकडेही बांधकाम परवानगीचे अधिकार तसेच जबाबदारी असणार आहे. या निर्णयामुळे शहरातील अनधिकृत बांधकामे तसेच बांधकाम विभागातील चुकीच्या कामांना पायबंद बसण्यास मदत होणार असल्याचा दावा महापालिका आयुक्त राम यांनी केला आहे. तसेच, वर्षानुवर्षे या अधिकारासह अनेक महत्त्वाचे अधिकार उप अभियंत्यांकडेच अधिकारांचे केंद्रीकरण झाल्याचे निदर्शनास आल्यानंतर हा निर्णय घेण्यात आला आहे. त्यासाठी, महापालिका आयुक्तांनी शहर अभियंता अनिरुद्ध पावसकर यांच्यासह अतिरिक्त आयुक्त पवनीत कौर यांची स्वतंत्र बैठक घेऊन हे बदल केले आहेत. तर, उप अभियंत्यांचे बांधकाम परवानगीचे अधिकार कमी केल्याने त्यांना आता शहरातील अनधिकृत बांधकामांसह बांधकाम विभागाच्या इतर कामकाजांसाठी वेळ देता येणार असल्याने प्रशासकीय कामकाजात गतिमानता येणार असल्याचे आयुक्तांनी स्पष्ट केले आहे. नवल किशोर राम, पुणे महापालिका आयुक्त असे आहेत नवीन बदल नवीन नियमांनुसार, २००० चौरस मीटरपेक्षा कमी क्षेत्रफळ असलेल्या प्रस्तावांना आता उप अभियंता स्तरावरच मान्यता दिली जाणार आहे. ज्या मिळकतींचे क्षेत्र २००० ते १०००० चौरस मीटरपर्यंत आहे, अशा सर्व ले-आऊट आणि बांधकाम प्रस्तावांच्या मंजुरीचे अधिकार कार्यकारी अभियंत्यांना देण्यात आले आहेत. १०००० चौरस मीटरपेक्षा जास्त क्षेत्रफळ असलेले किंवा पर्यावरण दाखल्याची आवश्यकता असलेले मोठे प्रकल्प अधीक्षक अभियंत्यांच्या मान्यतेने मार्गी लावले जातील. विशेष म्हणजे, कार्यकारी किंवा अधीक्षक अभियंत्यांनी प्रस्तावास मान्यता दिल्यानंतर, त्याबाबतचे अधिकृत संमतीपत्र देण्याची जबाबदारी कनिष्ठ व उप अभियंता यांच्यावर सोपवण्यात आली असून, यामुळे प्रशासकीय कामात गतिमानता येणार आहे. अनियंत्रित वाढ, अतिक्रमणे आणि अनियमितता वाढीस कारणीभूत ठरलेल्या गेल्या ३० वर्षांच्या परंपरेला आता पूर्णविराम मिळणार आहे. नव्या व्यवस्थेमुळे शहरी विकासात अधिक पारदर्शकता, जबाबदारी आणि नियोजनबद्धता येण्याची अपेक्षा आहे. – नवल किशोर राम (महापालिका आयुक्त)
