PMC Disaster Management – शहरात सुरू असलेल्या मुसळधार पावसाच्या पार्श्वभूमीवर आपत्कालीन परिस्थितीचा सामना करण्यासाठी महापालिकेने ४,५७० कर्मचारी आणि १,२०० हून अधिक यंत्रसामग्री सज्ज ठेवण्यात आला असल्याचा दावा महापालिकेच्या आपत्ती व्यवस्थापन विभागाने केला आहे. पूरस्थितीवर नियंत्रण ठेवण्यासाठी आपत्ती व्यवस्थापन कक्ष २४ तास कार्यरत असून, सर्व क्षेत्रीय कार्यालये, परिमंडळ कार्यालये आणि मुख्य खात्यांमध्ये समन्वयाने कामकाज सुरू असल्याची माहिती प्रशासनाने दिली.

पूरस्थितीत तातडीने समन्वय साधता यावा यासाठी मानक कार्यपद्धती (एसओपी) तयार करण्यात आली आहे. महापालिकेच्या सर्व क्षेत्रीय कार्यालयांतील कर्मचारी, अभियंते तसेच महापालिका सहाय्यक आयुक्त (इन्सिडंट कमांडर) संबंधित ठिकाणी तैनात करण्यात आले होते. याशिवाय महापालिकेच्या नियंत्रण कक्षात पोलीस बिनतारी यंत्रणा, अग्निशमन, पथ, मलनिःसारण आणि आपत्ती व्यवस्थापन विभागाचे कर्मचारी तैनात असून, सर्व विभागांशी समन्वय साधून परिस्थितीवर नियंत्रण ठेवण्यात येत आहे.

असे आहे मनुष्यबळ…
महापालिकेकडे ५० मुख्य आरोग्य निरीक्षक, ७० स्वच्छता निरीक्षक, ४०० स्वच्छता पर्यवेक्षक, ४ हजार सफाई कर्मचारी आणि ५० फवारणी कर्मचारी असे एकूण ४,५७० कर्मचारी उपलब्ध आहेत. याशिवाय ५०० डिझेल पंप, १०४ जेसीबी, ४२ डंपर, २४ हायवा ट्रक, ७७ जेटिंग मशिन, २९४ टिप्पर, १३१ छोटी वाहने, ३५ कॉम्पॅक्टर, २० घंटागाड्या, १० बिन लिफ्टर, १२ फॉगिंग मशिन, ५० स्प्रे पंप तसेच अन्य आवश्यक यंत्रसामग्री सज्ज ठेवण्यात आली आहे. तसेच, पूरप्रवण ४९ ठिकाणी क्षेत्रीय कार्यालयांच्या स्तरावर मदत केंद्रे स्थापन करण्यात आली असून, कोणतीही आपत्कालीन परिस्थिती उद्भवल्यास तातडीने मदत पोहोचविण्यासाठी सर्व यंत्रणा सज्ज ठेवण्यात आल्याचे महापालिकेने स्पष्ट केले आहे.