Pimpri Chinchwad Crime – दिघी पोलीस ठाण्याच्या हद्दीत झालेल्या कथित घरफोडीच्या गुन्ह्याचा गुन्हे शाखा युनिट-३ ने अवघ्या १२ तासांत छडा लावला. घरातील तब्बल १३ लाख ९८ हजार ९७८ रुपये किमतीचे सोन्या-चांदीचे दागिने पोलिसांनी जप्त केले. विशेष म्हणजे, बाहेरील चोरट्याने घरफोडी केली नसून, घर खरेदीसाठी पती दागिने विकतील या भीतीने पत्नीनेच ते घरात लपविल्याचे तपासात समोर आले.

दिघी पोलीस ठाण्यात याप्रकरणी गुन्हा दाखल झाला होता. त्याचा समांतर तपास गुन्हे शाखा युनिट-३ कडून सुरू होता. वरिष्ठ पोलीस निरीक्षक संतोष कसबे यांच्या नेतृत्वाखाली पथकाने घटनास्थळाची पाहणी करून परिसरातील सीसीटीव्ही फुटेज तपासले. तसेच मोबाइलचे तांत्रिक विश्लेषण करण्यात आले. तपासादरम्यान घरात बाहेरील संशयित व्यक्ती आल्याचे कोणतेही पुरावे मिळाले नाहीत. त्यामुळे पोलिसांनी इमारतीमधील इतर रहिवासी आणि घरातील व्यक्तींकडे चौकशी सुरू केली.

वरिष्ठ पोलीस निरीक्षक संतोष कसबे आणि पोलीस हवालदार युवराज बिराजदार यांनी कौशल्याने चौकशी केली. त्यावेळी फिर्यादीच्या पत्नीने दागिने लपविल्याची कबुली दिली. नवीन घर खरेदी करताना आपले दागिने विकले जातील,अशी भीती महिलेला होती. ते विकले जाऊ नयेत यासाठी तिने घरफोडीचा बनाव रचला होता. तिने घरातील गुप्त ठिकाणी लपविलेले सर्व दागिने पंचांसमक्ष पोलिसांच्या स्वाधीन केले. पुढील तपास पोलीस उपनिरीक्षक वरे करीत आहेत.