Pune News : १२ वर्षीय मुलीवर शेजाऱ्याने लैंगिक अत्याचार केल्याच्या घटनेच्या निषेधार्थ आणि मुलीला न्याय मिळावा, या मागणीसाठी रविवारी रात्री विश्रांतवाडी पोलिस ठाण्यासमोर ५०० हून अधिक नागरिकांनी आंदोलन केले. आंदोलनकर्त्यांनी येरवडा प्रादेशिक मनोरुग्णालयाजवळील चौकात ठिय्या देत वाहतूक रोखल्याने पुणे-आळंदी रस्ता, जेल रस्ता तसेच त्याचा परिणाम विमानतळ रस्त्यावरील वाहतुकीवर झाला. (Pune News)

या प्रकरणात पोलिसांनी ५२ वर्षीय शेजाऱ्याला यापूर्वीच अटक केली आहे. आरोपी पुणे महापालिकेत कंत्राटी कर्मचारी म्हणून काम करीत असल्याचे पोलिसांनी सांगितले. मुलीच्या आईने २२ सप्टेंबर रोजी तक्रार दिल्यानंतर पोलिसांनी गुन्हा दाखल केला. (Pune News)

वैद्यकीय अहवाल प्राप्त झाल्यानंतर बलात्काराच्या कलमाची वाढ करण्यात आली असून, पॉक्सो कायद्यानुसारही कारवाई करण्यात आली आहे. दरम्यान, गुन्ह्यात कठोर कलमे लावण्यात आली नसल्याचा गैरसमज नागरिकांमध्ये झाल्याने रविवारी सायंकाळी मोठ्या संख्येने नागरिक पोलिस ठाण्याकडे जमा झाले. (Pune News)

त्यानंतर त्यांनी अधिक कठोर कलमे लावण्याची मागणी करीत आंदोलन सुरू केले. पोलिसांनी नागरिकांना वैद्यकीय अहवाल प्राप्त झाल्यानंतर तक्रारदार महिला आणि मुलीचा पूरक जबाब घेऊन भारतीय न्याय संहितेतील कलम ६५(२) अंतर्गत कारवाई करण्यात आल्याचे स्पष्ट केले. तसेच पॉक्सो कायद्यातील तरतुदीही लागू करण्यात आल्याचे पोलिसांनी सांगितले. (Pune News)

रात्री सुमारे नऊ वाजता आंदोलक माघारी परतू लागल्यानंतर पोलिसांनी वाहतूक सुरळीत करण्यास सुरुवात केली. साडेनऊ वाजेपर्यंत वाहतूक पूर्ववत करण्यात आली असून परिस्थिती नियंत्रणात असल्याचे पोलिसांनी सांगितले. (Pune News)