Maharashtra Fuel : राज्यात काही भागांमध्ये पेट्रोल-डिझेलच्या तुटवड्याची परिस्थिती निर्माण झाल्याने नागरिकांमध्ये चिंतेचे वातावरण आहे. अनेक पेट्रोल पंपांवर वाहनांच्या लांबच लांब रांगा दिसत असून, विशेषतः ग्रामीण भागात डिझेलचा तुटवडा अधिक जाणवत आहे. (Maharashtra Fuel)

शेतीच्या कामांना सुरुवात झाल्याने डिझेलची मागणी वाढली आहे. या पार्श्वभूमीवर मुख्यमंत्री देवेंद्र फडणवीस यांनी महत्त्वाची माहिती देत नागरिकांना आणि प्रशासनाला आवाहन केले आहे. (Maharashtra Fuel)

मुख्यमंत्री फडणवीस म्हणाले, “सर्व जिल्हाधिकाऱ्यांना सूचना दिल्या आहेत. विशेषतः डिझेलची साठेबाजी होऊ देऊ नका. शेतकऱ्यांना आवश्यकतेनुसार डिझेल मिळालं पाहिजे, यासाठी प्रशासनाने लक्ष घालावे. काही ठिकाणी तणावाची स्थिती असली तरी संपूर्ण राज्यात अशी परिस्थिती नाही. एखादी घटना हायलाइट केली जाते, मात्र अशी परिस्थिती नियंत्रणात ठेवण्यासाठी प्रयत्न सुरू आहेत.” (Maharashtra Fuel)

अफवांमुळे अनेक नागरिक पेट्रोल पंपांवर धाव घेत टाक्या फुल करत असल्याने इंधनाचा साठा वेगाने संपत असल्याचेही प्रशासनाचे निरीक्षण आहे. त्यामुळे नागरिकांनी घाबरून जाऊन अतिरिक्त साठा करू नये, असे आवाहन सरकारकडून करण्यात आले आहे. (Maharashtra Fuel)

दरम्यान, हॉर्मुज सामुद्रधुनीतील तणावामुळे भारतात पेट्रोल-डिझेल पुरवठ्यावर परिणाम होत असल्याची चर्चा सुरू आहे. इराण आणि अमेरिकेमधील वाढत्या संघर्षामुळे जागतिक ऊर्जा संकट अधिक तीव्र होण्याची भीती व्यक्त केली जात आहे. इराणने अमेरिकेच्या अटी मान्य केल्या नाहीत, तर पुन्हा युद्धजन्य परिस्थिती निर्माण होऊ शकते, अशी शक्यता वर्तवली जात आहे. त्यामुळे आंतरराष्ट्रीय बाजारात इंधन पुरवठा आणि वाहतुकीवर दबाव वाढत आहे. (Maharashtra Fuel)

या इंधन तुटवड्याचा परिणाम आता जीवनावश्यक वस्तूंवरही दिसू लागला आहे. जळगाव जिल्ह्यात खाद्यतेलाच्या दरात प्रतिलिटर ३ ते ५ रुपयांनी वाढ झाल्याची माहिती विक्रेत्यांनी दिली आहे. डिझेल तुटवड्यामुळे वाहतूक खर्च वाढला असून, खाद्यतेल वाहून नेणारे अनेक टँकर तेल कंपन्यांमध्येच अडकून पडल्याचे सांगितले जात आहे.

डिझेल वेळेवर उपलब्ध होत नसल्याने दररोज येणारे १५ ते २० टँकर गेल्या चार ते पाच दिवसांपासून थांबले आहेत. परिणामी खाद्यतेलाचा तुटवडा निर्माण होण्याची भीती व्यक्त केली जात आहे. (Maharashtra Fuel)