PCMC Land Scam – पिंपरी चिंचवड महापालिकेच्या विकास आराखड्यातील आरक्षित असलेला सव्वा दोन एकरचा भूखंड भाडेतत्वावर देण्याचा प्रस्ताव शिक्षण विभागाने केला आहे. त्यासाठी महापालिकेच्या भूमी व जिंदगी विभागाने निविदा काढली आहे. यामध्ये एका आमदाराने हस्तक्षेप करत भूखंड लाटण्यासाठी दबाव वाढवल्याची चर्चा आहे. एका ठराविक खासगी शिक्षण संस्थेला हा भूखंड आंदण देण्यासाठी महापालिकेने सर्व नियम धाब्यावर बसवले आहेत.

त्यामुळे या भूखंडाचे श्रीखंड कोण खातयं असा सवाल उपस्थित केला जात आहे. महापालिकेच्या माध्यमिक शाळेसाठी आरक्षित असलेली ही जागा (स. नं. ३८ पै. व ४४ पै.) मंजूर विकास योजनेतील ९१ गुंठे इतकी जागा तब्बल ३० वर्षांच्या दीर्घ मुदतीसाठी भाडेतत्त्वावर देण्याचा घाट शिक्षण विभाग आणि भूमी व जिंदगी विभागाने घातला आहे. ही जागा सध्या महापालिकेच्या ताब्यात आहे.

पुनावळेतील हा भूखंड महापालिकेने स्वतःची माध्यमिक शाळा उभारण्यासाठी आरक्षित ठेवला होता. मात्र, पालिकेच्या शिक्षण विभागाने सर्व नियम धाब्यावर बसवून हा भूखंड थेट एका खासगी शिक्षण संस्थेला देण्याचा वादग्रस्त प्रस्ताव तयार केला. विशेष म्हणजे, या प्रस्तावाला प्रशासकीय मान्यता मिळवून देण्यासाठी पालिकेच्या भूमी व जिंदगी विभागाकडून घाईघाईने निविदा प्रक्रिया राबविण्यात आली. ही संपूर्ण प्रक्रिया अत्यंत गुप्तपणे आणि एका विशिष्ट संस्थेला डोळ्यासमोर ठेवून राबवली गेल्याचा संशय व्यक्त होत आहे.

यामध्ये महापालिकेच्या एकूण १.८० हेक्टर क्षेत्रापैकी ०.९१ हेक्टर आर क्षेत्रफळ म्हणजे (९१ गुंठे) ९१०० चौ.मी. (९७९५२.४ चौ.फूट) हे महापालिकेने ताब्यात घेतले आहे. ही जागा माध्यमिक शाळा आरक्षण तरतुदीनूसार विकसित करण्यात येणार आहे. या जागेसाठी नगररचना विभागाने ठरविलेल्या दरानुसार ३० वर्ष कालावधीसाठी दर मागविण्यात आले होते. निविदा रक्कम ५ कोटी ७४ लाख १०६ याप्रमाणे तीन निविदा प्राप्त झाल्या होत्या.

तिन्ही निविदा पात्र ठरल्या असून त्यापैकी एका संस्थेने सर्वोच्च दर सादर केला आहे. त्यांनी ३० वर्षांसाठी ७ कोटी रुपये दर दिला आहे. दरम्यान, या मोक्याच्या जागेवर महापालिकेने स्वतः शाळा उभारण्याऐवजी, ती जागा एका खासगी संस्थेला ३० वर्षांच्या दीर्घकालीन भाडेतत्त्वावर देण्याचा प्रस्ताव मंजूर केला आहे. यावरून आता महापालिका प्रशासन व सत्ताधारी भाजपवर टीका होऊ लागली आहे.

विद्यार्थी उपाशी, शिक्षणसम्राट तुपाशी
महापालिकेच्या १०५ प्राथमिक आणि १८ माध्यमिक शाळा असून, यामध्ये ५८ हजार विद्यार्थी शिक्षण घेत आहेत. महापालिकेच्या एकूण १२३ शाळा आहेत. यासाठी ८७ इमारती आहेत. या मधील ६१ शाळा इमारत परिसरात खेळाचे मैदान आहे. तर २६ शाळांच्या इमारती या रस्त्याच्या बाजूला आहेत. त्यांना खेळायचे मैदान देखील नाही. काही शाळांना इमारती देखील नाही. महापालिका शाळांतील विद्यार्थ्यांच्या नशिबी हाल असताना महापालिका शिक्षण सम्राटांचे भले करण्यात व्यस्त आहे.

“महापालिकेच्या वापरात नसलेल्या काही इमारती खासगी संस्थांना भाडे कराराने दिलेल्या आहेत. त्या जागेचे भाडे देखील वेळोवेळी वसूल केले जाते. ज्या संस्थाचे भाडे थकीत आहे. त्यांच्याकडून थकबाकी वसूल केली जात आहे. आता पुनावळे माध्यमिक शाळा आरक्षणाची जागा ३० वर्षासाठी भाड्याने देण्यासाठी निविदा प्रक्रिया राबविली आहे. त्यात तीन संस्था पात्र होवून एका संस्थेने सर्वाधिक दर दिल्याने त्या संस्थेचा प्रस्ताव स्थायी समितीकडून आयुक्तांकडे ठेवला आहे.”
– सिताराम बहूरे , उपायुक्त, भूमी व जिंदगी विभाग, महापालिका.