Bajrang Punia | भारताचा स्टार कुस्तीपटू बजरंग पुनिया याला नॅशनल अँटी डोपिंग एजन्सीने (NADA) 4 वर्षांसाठी निलंबित (Bajrang Punia NADA Ban) केले आहे. यानंतर आता त्याची कारकीर्द संपणार का, असा प्रश्न निर्माण झाला आहे. मंगळवारी राष्ट्रीय उत्तेजक विरोधी संस्थेने बजरंगला निलंबित केले. पुनियाने 10 मार्च रोजी राष्ट्रीय संघ निवडीदरम्यान डोप चाचणीसाठी आपला नमुना देण्यास नकार दिला होता.

दरम्यान, बजरंग पुनियाचे निलंबन 23 एप्रिल 2024 पासून सुरू झाले होते. यानंतर युनायटेड वर्ल्ड रेसलिंगनेही त्याला निलंबित केले होते. तथापि, बजरंगने निलंबनाविरुद्ध अपील केले होते, जे 31 मे रोजी अँटी-डिसिप्लिनरी डोपिंग पॅनेलने (ADDP) रद्द केले होते. यानंतर नाडाने बजरंगला 23 जून रोजी नोटीस दिली होती. बजरंग पुनियाने 11 जुलै रोजी लेखी निवेदनाद्वारे या आरोपाला आव्हान दिले. यानंतर 20 सप्टेंबर आणि 4 ऑक्टोबर रोजी सुनावणी झाली. यामध्ये अनुशासनात्मक डोपिंग पॅनेलच्या सांगितले की, “खेळाडू हा कलम 10.3.1 अंतर्गत 4 वर्षांच्या निलंबनास जबाबदार आहे.”

या निलंबनाचा अर्थ असा की बजरंगला 4 वर्षे आता कोणत्याही स्पर्धेत भाग घेता येणार नाही. याशिवाय, अनेक सवलतींना मुकावं लागेल. तसंच तो परदेशातही कोचिंगच्या नोकरीसाठी अर्ज करू शकणार नाही. पॅनेलने नमूद केल्यानुसार, बजरंगच्या निलंबनाचा हा कालावधी 23 एप्रिल 2024 पासून लागू आहे. दरम्यान, बजरंगला एका नकारामुळे चार वर्षांसाठीची शिक्षा भोगावी लागणार आहे.

या बंदीनंतर त्याच्या कारकिर्दीवर साहजिकच मोठा परिणाम होणार आहे. कोणत्याही खेळाडूला दुखापतीनंतर किंवा दीर्घ बंदीनंतर पुनरागमन करणे खूप अवघड असते. अशा बंदीनंतर खेळाडूची कारकीर्द जवळपास संपुष्टात येते, असे अनेकदा मानले जाते. आता या बंदीचा बजरंग पुनियाच्या कारकिर्दीवर काय परिणाम होतो हे पाहणे उत्सुकतेचे ठरणार आहे.

IPL 2025 : आयपीएलमध्ये 27 कोटी मिळणाऱ्या पंतला मिळणार नाही पूर्ण पैसे? जाणून घ्या, Tax कापून हातात किती येईल रक्कम…

बजरंगने केला आहे काँग्रेसमध्ये प्रवेश..

बजरंग आता राजकारणाच्या मैदानात उतरला आहे हे विशेष. त्याने त्याची सहकारी कुस्तीपटू विनेश फोगटसह काँग्रेस पक्षात प्रवेश केला होता. टोकियो ऑलिम्पिकमध्ये भारतासाठी कुस्तीमध्ये कांस्यपदक जिंकणारा बजरंग पुनिया याने भारतीय कुस्ती महासंघाचे माजी अध्यक्ष ब्रिजभूषण शरण सिंग यांच्या विरोधातील आंदोलनात भाग घेतला होता. त्यांनी आंदोलन देखील केले होते. आता त्यांच्याकडे अखिल भारतीय किसान काँग्रेसची धुरा सोपवण्यात आली आहे. बजरंगची सहकारी पैलवान विनेश फोगच ही हरियाणाच्या जुलाना विधानसभेतून आमदार म्हणून निवडून आली आहे.