Vinesh Phogat : नाडाने विनेश फोगटला बजावली नोटीस, 14 दिवसांत मागितले उत्तर, जाणून घ्या…काय आहे प्रकरण
NADA & Vinesh Phogat : नॅशनल अँटी-डोपिंग एजन्सीने (NADA) बुधवारी कुस्तीपटू विनेश फोगटला तिच्या पत्त्याची ( राहण्याच्या ठिकाणाची) माहिती न दिल्याबद्दल नोटीस बजावली. यासंदर्भात नाडाने तिच्याकडून 14 दिवसांत उत्तर मागितले आहे. सर्व खेळाडूंना डोप चाचणीसाठी त्यांच्या उपलब्धतेबद्दल नाडाला माहिती देणे आवश्यक असते आणि या खेळाडूंमध्ये विनेशचाही समावेश आहे. यासंदर्भातला तपशील भरल्यानंतर खेळाडू नियोजित वेळी त्याठिकाणी आढळून आला नाही तर हे उल्लंघन मानले जाते.
नाडाने मागवले उत्तर…
नाडाने जारी केलेल्या नोटीसमध्ये तिने (विनेश) तिच्या पत्त्याबाबत स्पष्टपणे माहिती दिली नसल्याचे म्हटले आहे. वास्तविक, विनेशने 9 सप्टेंबर रोजी सोनीपतच्या खरखोडा गावात तिच्या घरी डोप चाचणीसाठी उपलब्ध असल्याची माहिती दिली होती. मात्र, नियोजित वेळी व तारखेला ती तेथे आढळली नाही. आता नाडाने हे उल्लंघन मानले असून तिच्याकडून उत्तर मागितले आहे.
नाडाचे विधान…
नाडाच्या नोटीसमध्ये म्हटले आहे की, “एडीआर (ADR) आवश्यकतांचे पालन करण्यात स्पष्टपणे अयशस्वी झाल्याबद्दल सूचित करणारी एक औपचारिक नोटीस तुम्हाला देण्यात येत आहे आणि या प्रकरणावर अंतिम निर्णय घेण्यापूर्वी तुम्हाला कोणतीही टिप्पणी देण्यासाठी(बाजू मांडण्यासाठी) आमंत्रित केले जात आहे. तुमची डोप चाचणी घेण्यासाठी 9 सप्टेंबर रोजी डोप कंट्रोल ऑफिसर (डीसीओ) यांना तुमच्या राहत्या ठिकाणी पाठवण्यात आले होते पण तुम्ही नियोजित स्थळी उपस्थित नसल्यामुळे ते चाचणी घेऊ शकले नाही. विनेशला एकतर उल्लंघन मान्य करावे लागेल किंवा त्या ठिकाणी सुमारे 60 मिनिटे उपस्थित असल्याचा तिला पुरावा द्यावा लागेल.
परंतु येथे नमूद केले जाऊ शकते की, नियमानुसार चाचणीसाठी एकदा नियोजित स्थळी उपस्थित नसणे हे डोपिंगविरोधी नियमांचे उल्लंघन मानले जात नाही. जर एखाद्या खेळाडूने 12 महिन्यांत तीन वेळा स्थळ माहिती नियमांचे उल्लंघन केले तरच NADA त्याला दोषी ठरवू शकते.
दरम्यान, पॅरिस ऑलिम्पिकमध्ये अंतिम फेरी गाठूनही वजन जास्त असल्याने पदक न मिळाल्याच्या निराशेनंतर कुस्तीपटू विनेशने खेळातून निवृत्ती जाहीर केली होती. विनेश आणि तिचा सहकारी कुस्तीपटू बजरंग पुनिया अलीकडेच काँग्रेस पक्षात सामील झाले आहेत आणि आगामी हरियाणा विधानसभा निवडणूक जुलाना मतदारसंघातून लढवत आहेत. सध्या ते जुलाना मतदारसंघात प्रचारात व्यस्त आहेत.
