रांजणगाव गणपती : पुणे – संभाजीनगर राष्ट्रीय महामार्ग क्रमांक ७५३ एफ अंतर्गत प्रस्तावित पुणे ते शिरूर उन्नत महामार्ग प्रकल्पाच्या अनुषंगाने कोंढापुरी गावात निर्माण होणाऱ्या विविध समस्यांवर चर्चा करण्यासाठी आयोजित विशेष ग्रामसभा मोठ्या संख्येने नागरिकांच्या उपस्थितीत पार पडली. प्रस्तावित टोलनाका, ओव्हरब्रिजचा अभाव, अतिरिक्त भूसंपादन, सर्व्हिस रोड, स्थानिक नागरिकांच्या सुरक्षिततेच्या प्रश्नांवर ग्रामसभेत सविस्तर चर्चा केली. महामार्गाचा विकास करताना कोंढापुरीचे अस्तित्व, शेतकऱ्यांचे हित आणि ग्रामस्थांच्या मूलभूत सुविधांचा बळी जाऊ देणार नाही, असा ठाम सूर यावेळी उमटला.

महामार्ग प्रकल्पामुळे कोंढापुरी गावातील शेतकऱ्यांच्या जमिनींचे अतिरिक्त भूसंपादन होण्याची शक्यता असून, त्यामुळे अनेक शेतकऱ्यांच्या शेतीचे नुकसान होणार आहे. महामार्गामुळे शेतजमिनींचे तुकडे पडणे, शेतीकडे जाण्या-येण्याचे मार्ग बंद होणे, दैनंदिन शेतीकामांसाठी अडचणी निर्माण होण्याची भीती शेतकऱ्यांनी व्यक्त केली. त्यामुळे अनावश्यक भूसंपादन टाळून शेतकऱ्यांचे नुकसान होणार नाही, अशा पद्धतीने प्रकल्पाचे नियोजन करावे, अशी मागणी केली.

कोंढापुरी परिसरात शाळा, महाविद्यालये, विविध शैक्षणिक संस्था, आरोग्य सुविधा, आरोग्य उपकेंद्र, विविध शासकीय कार्यालये असल्याने परिसरात नागरिकांची आणि विद्यार्थ्यांची मोठ्या प्रमाणात वर्दळ असते. ९ हजार ९०० विद्यार्थी शिक्षण घेत असल्याचा मुद्दाही ग्रामसभेत मांडण्यात आला. अशा परिस्थितीत महामार्गावर सुरक्षित ये-जा करण्यासाठी योग्य व्यवस्था, ओव्हरब्रिज, भुयारी मार्ग, सेवा रस्त्याची आवश्यकता असल्याचे ग्रामस्थांनी अधोरेखित केले.

टोलनाका, ओव्हरब्रिजबाबत भूमिका स्पष्ट करा

गावाच्या हद्दीत प्रस्तावित टोलनाक्यामुळे स्थानिक नागरिकांना भविष्यात आर्थिक व वाहतुकीच्या अडचणींना सामोरे जावे लागण्याची शक्यता व्यक्त केली. ओव्हरब्रिजची योग्य व्यवस्था नसल्यास गावातील नागरिक, विद्यार्थी, शेतकरी, वाहनचालकांच्या सुरक्षिततेचा प्रश्न गंभीर होऊ शकतो. त्यामुळे टोलनाक्याचे नियोजन, ओव्हरब्रिजची उभारणी, सेवा रस्त्याची व्यवस्थेबाबत प्रशासनाने स्पष्ट भूमिका मांडावी, अशी मागणी केली. गावातील दळणवळणाची व्यवस्था कायम ठेवा, विद्यार्थ्यांच्या सुरक्षिततेला प्राधान्य द्यावे, बाधितांना विश्वासात घेऊनच पुढील कार्यवाही करावी, अशी भूमिका ग्रामसभेत मांडली. यावेळी नागरिकांनी मोठ्या संख्येने उपस्थित राहून भूमिका मांडली.