Gautam Gaikwad : पुण्यातील प्रसिद्ध सिंहगड किल्ल्यावर आपल्या मित्रांसोबत वर्षाविहारासाठी आलेला बेपत्ता झालेला २४ वर्षांचा तरुण गौतम गायकवाड अखेर सापडला आहे. २० अॅागस्टच्या दिवशी गौतम आपल्या मित्रांना लघुशंकेला जातो असं सांगून गेला पण परतलाच नाही, यामुळे त्याच्या मित्रांनी शोधाशोध केली. पण तो सापडला नाही. अखेर त्याच्या मित्रांनी याबाबत पोलिसांनी कळवळे. यानंतर पोलीस तातडीने घटनास्थळी धाव घेतली.

त्यांनी NDRF, अग्निशामक दल, वन विभाग, पुणे ग्रामीण पोलीस आणि स्थानिक ट्रेकर्स यांनी सलग चार दिवस पावसात आणि दाट धुक्यात शोधमोहीम राबवली. अखेर 24 ऑगस्ट 2025 रोजी सायंकाळी गौतम जिवंत सापडला, पण दरम्यानच्या काळात त्याच्या बेपत्ता होण्यामागणे अनेक तर्कविर्तक लावण्यात येत होते. तसेच गौतम नेमका कुठे आहे असा प्रश्न विचारला जात होता. आता तो सापडला आहे, यामुळे बेपत्ता झाल्यानंतर त्याने कसे दिवसे काढले याबाबत चक्रावून सोडणारी कहाणी सांगितली आहे.

कोण आहे गौतम गायकवाड?

गौतम गायकवाड हा मूळाचा सातारा जिल्ह्यातील फलटणचा रहिवासी आहे. सध्या तो हैद्राबाद येथे राहत आहे. त्याचा फळांचा व्यवसाय आहे. २० अॅागस्ट या दिवशी गौतम आपल्या मित्रांसोबत पुण्यातील सिंहगड किल्ल्यावर वर्षाविहार करण्यासाठी आला होता.

नेमकं काय घडलं त्या दिवशी?

घटनेच्या दिवशी सायंकाळी 4:30 वाजता तानाजी कडा परिसरात पोहोचल्यानंतर गौतमने लघुशंकेसाठी जातो, असं सांगून मित्रांना बाजूला जाण्याचं कारण दिलं. मात्र तो परतला नाही. त्याची चप्पल हवा पॉइंटजवळ आढळली, आणि त्यामुळे तो दरीत पडला असावा, अशी शंका निर्माण झाली. पोलिसांनी धाव घेत शोधमोहिम राबविली. हवेली पोलीस, आपत्ती व्यवस्थापन पथक आणि स्थानिक ट्रेकर्सनी शोधमोहीम सुरू केली. पावसामुळे दृश्यमानता कमी होती, आणि रात्री 11 वाजता शोधमोहीम थांबवावी लागली.

तीन दिवस शोधकार्य

त्यानंतर पुढचे तीन दिवस सलग शोध सुरू होता, पण गौतमचा मागमूस लागत नव्हता. दरम्यान, किल्ल्याच्या पायथ्याशी असलेल्या सीसीटीव्ही फुटेजमध्ये एक व्यक्ती लपतछपत पळताना दिसली, जी गौतम असू शकते, असा पोलिसांचा संशय होता. या फुटेजमुळे गौतम खरोखर दरीत पडला की त्याने स्वतःहून बेपत्ता होण्याचा बनाव रचला, असा प्रश्न उपस्थित झाला होता.

अखेर गौतम सापडला

२४ अॅागस्ट २०२५ च्या सायंकाळी साडेसात वाजण्याच्या सुमारास मालुसरे स्मारकाजवळ स्थानिकांना एक तरुण सापडला. हा सापडलेला तरुण म्हणजे दुसरा तिसरा कुणी नसून गौतम गायकवाड होता. त्याची अवस्था बिकट होती. तो थंडीत कुडकुडत होता. त्याच्या शरीरावर किरकोळ जखमाही आढळल्या होत्या. स्थानिकांनी तातडीने त्याला रुग्णालयात दाखल केलं.

पोलिसांना संशय

पोलिसांनी गौतमची चौकशी केली असून, या प्राथमिक चौकशीत तो दरीत पडला आणि स्वतःला वाचविण्यासाठी धडपड होता. मात्र, पोलिसांना संशय आहे आहे की त्याच्यावर मोठं कर्ज आहे, आणि याच कारणामुळे त्याने बनाव रचला असावा.

काय म्हणाला गौतम?

आता मी ठीक आहे. मी सिंहगडावर फिरायला आलो होतो. आम्ही फिरत होतो. त्यावेळी मला लघुशंका आली म्हणून मी गेलो. तिथे एक कुत्रा अगदीच जवळ होता, तो घसरत होता म्हणून त्याला वाचवायला गेलो आणि माझाही पाय घसरला. कुत्र्याचं काय झालं ते माहीत नाही, पण मी खाली घसरलो आणि मला चढता येईना. मी आरडाओरडा केला पण कुणालाही माझा आवाज गेला नाही

थोडं पुढे गेल्यावर….

माझ्यापासून मित्र लांब होते. तिथे थोडं गवत होतं त्याचा मी आधार घेतला. पण मला वरती चढता येत नव्हतं मी खाली घसरु लागला. मग अंधार झाला होता. तरीही मी वर जायचा प्रयत्न केला. मला भीती वाटली. जसा रस्ता दिसत होता किंवा रस्ता मिळत गेला तसा मी जात होतो. थोडं पुढे गेल्यावर खूप पाऊस आला. मला कुणाचा आवाजही आला नाही. मग मी कुणाला दिसेन ही आशा मी सोडून दिली. मी गवतावरच बसलो, मी बेशुद्ध पडत होतो, असं गौतम गायकवाड याने एका वाहिनासोबत बोलताना सांगितलं आहे.

काही ऐकूही येत नव्हतं

माझ्या केसांमध्ये किडे आणि पाखरं शिरली. माझ्याकडे पाऊच होतं त्यात माझं ब्लेड होतं. त्याने मी जमेल तसे केस कापले. दाढीही काढली. मला कुणाचा आवाज आला नाही. काही ऐकूही येत नव्हतं. मला जशी जाग येत होती तसं मी वरती जायचा प्रयत्न करत होतं, अशी माहिती त्याने दिली आहे.

….. त्यावेळी दोघं मला शोधत आले

मी चार दिवस उपाशी होतो, पाणीही प्यायला मिळालं नाही. पाऊसच पडत होता. त्या पावसात मी भिजत होतो. मी पहिल्यांदा डोळे उघडले तेव्हा अंधारच होता. मी जसं जमेल तसं मी चालत होतो. पण भुकेने ताकदही अंगात नव्हती आणि माझं डोकंही चालत नव्हतं. मी गवताच्या मदतीने वरती कसाबसा येत गेलो. मला माणसं दिसली पण लोक लांब होते. मोठी झाडं होती त्यांचा आधार घेऊन मी आलो. एक लाकूड होतं तिथे बसलो. त्यावेळी दोघं मला शोधत आले, असं गौतम गायकवाड याने सांगितलं आहे.

हेही वाचा : Pune : एका नियमाकडे दुर्लक्ष अन् नकाशाच बदलला; १६ प्रभागांना फटका