Murlidhar Mohol- महाराष्ट्र लोकसेवा आयोगाच्या (एमपीएससी) विविध मागण्यांसाठी पुण्यात सुरू असलेले विद्यार्थ्यांचे आंदोलन आता राजकीय वळण घेत असल्याचा आरोप भाजप नेते व केंद्रीय राज्यमंत्री मुरलीधर मोहोळ यांनी केला आहे. आमदार रोहित पवार यांनी पाठविलेल्या शिष्टमंडळाने मुख्यमंत्र्यांसोबतच्या चर्चेनंतर समाधान व्यक्त करत आंदोलन स्थगितीची घोषणा केली होती. मात्र, तरीही रोहित पवार विद्यार्थ्यांना पुढे करून स्वतःचे राजकारण साधत असून,

आंदोलनाला काँग्रेसच्या अधिवेशनाचे स्वरूप आले, अशी टीका मोहोळ यांनी रविवारी पत्रकार परिषदेत केली. माध्यमांशी बोलताना मोहोळ म्हणाले, मुख्यमंत्री देवेंद्र फडणवीस यांनी रोहित पवारांच्या शिष्टमंडळाला पावणेतीन तास देऊन जवळजवळ १०० टक्के मागण्या मान्य केल्या. आयोगाच्या अध्यक्षांचा राजीनामा संवैधानिक बाबींमुळे तातडीने घेता येत नसला, तरी तीन महिन्यांत न्यायालयीन चौकशीचे आश्वासन दिले आहे, तरीही आंदोलन सुरू ठेवणे अयोग्य आहे.

या आंदोलनाला काँग्रेसच्या अधिवेशनाचे स्वरूप आले असून, सकाळपासून संध्याकाळपर्यंत केवळ राजकीय नेते तिथे येऊन भाषणे ठोकत आहेत. विद्यार्थीशक्तीचा वापर करून कोणी आपली राजकीय पोळी भाजत आहे का, याचा विचार विद्यार्थी आणि त्यांच्या पालकांनी करण्याची वेळ आली आहे, याकडे त्‍यांनी लक्ष वेधले. स्पर्धा परीक्षेचे विद्यार्थी ग्रामीण भागातून व सामान्य परिस्थितीतून आलेले आहेत. त्यांच्या कष्टाचा सन्मान करत सरकारने सर्व मागण्या मान्य केल्याने, विद्यार्थ्यांनी आपल्या भविष्याचा विचार करून आंदोलन मागे घ्यावे, असे आवाहन मोहोळ यांनी केले.