Pune : महाराष्ट्र लोकसेवा आयोगाचे (एमपीएससी) अध्यक्ष विवेक भीमनवार यांच्या राजीनाम्याच्या मागणीवर मुख्यमंत्र्यांनी ठोस आश्वासन न मिळाल्याने स्पर्धा परीक्षेच्या विद्यार्थ्यांनी गुरुवारी आक्रमक भूमिका घेतली आहे. गांधी जयंतीदिनी म्हणजेच २ ऑक्टोबरपासून पुकारण्यात आलेल्या आंदोलनाची रणनीती बदलत विद्यार्थ्यांनी गुरुवारी (दि. १) रात्रीपासूनच रस्त्यावर उतरून अचानक आंदोलनाला सुरुवात केली.

राष्ट्रवादी काँग्रेसचे (शरदचंद्र पवार गट) आमदार रोहित पवार यांच्या नेतृत्वाखाली शेकडो उमेदवारांनी एस. एम. जोशी पुलाजवळ ठिय्या मांडल्याने तणावाचे वातावरण निर्माण झाले आहे.

काही दिवसांपासून विविध मागण्यांसाठी एमपीएससीचे विद्यार्थी आंदोलन करत आहेत. बुधवारी मुख्यमंत्री आणि विद्यार्थ्यांच्या शिष्टमंडळात झालेल्या बैठकीत काही मागण्यांवर सकारात्मक चर्चा झाली; परंतु आयोगाच्या अध्यक्षांना हटवण्याबाबत कोणताही ठोस निर्णय झाला नाही.

एमपीएससी अध्यक्ष हे घटनात्मक पद असून, संविधानाच्या कलम ३१७ नुसार केवळ राष्ट्रपतींनाच सर्वोच्च न्यायालयाच्या सल्ल्याने त्यांना हटवण्याचा अधिकार आहे. सरकारने तीन महिन्यांत न्यायालयीन चौकशीचे आश्वासन दिले असले, तरी मंत्रिमंडळाच्या बैठकीत राजीनाम्याचा प्रस्ताव मंजूर करून तो राज्यपाल आणि राष्ट्रपतींकडे तत्काळ पाठवावा, अशी विद्यार्थ्यांची ठाम मागणी आहे.

पोलिसांनी या आंदोलनाला २ ऑक्टोबरपासून परवानगी दिली होती; मात्र विद्यार्थ्यांनी गुरुवारी रात्रीच आंदोलन सुरू केल्याने पोलिसांनी घटनास्थळी धाव घेतली. वरिष्ठ पोलीस अधिकाऱ्यांनी आमदार पवार व विद्यार्थ्यांशी चर्चा करून आंदोलन थांबवण्याची विनंती केली, परंतु अध्यक्षांच्या राजीनाम्याची प्रक्रिया सुरू झाल्याशिवाय मागे न हटण्याचा निर्धार आंदोलकांनी व्यक्त केला. त्यामुळे रात्री उशिरापर्यंत कडक पोलीस बंदोबस्तात हे आंदोलन सुरूच होते. सरकार आता यावर काय निर्णय घेते, याकडे सर्वांचे लक्ष लागले आहे.