Mumbai Pune Railway – लोणावळा–कर्जत रेल्वे मार्गावर मुसळधार पावसामुळे अनेक ठिकाणी दरडी कोसळल्याने रेल्वे वाहतुकीवर मोठा परिणाम झाला आहे. गेल्या सहा दिवसांपासून या मार्गावरील वाहतूक विस्कळीत असून, सध्या दुरुस्त केलेल्या एकाच मार्गावरून रेल्वेगाड्या चालविण्यात येत आहेत. उर्वरित मार्ग पूर्ववत करण्याचे काम युद्धपातळीवर सुरू असले, तरी त्यासाठी आणखी काही दिवस लागण्याची शक्यता असल्याने मध्य रेल्वेने १७ जुलैपर्यंत अनेक गाड्यांच्या मार्गात आणि वेळापत्रकात तात्पुरते बदल केले आहेत.

प्रवाशांची गैरसोय कमी करण्यासाठी काही लांब पल्ल्याच्या गाड्या दौंड–मनमाड–इगतपुरी–कल्याण, दौंड–मनमाड–जळगाव–पाळधी–सुरत, तसेच कल्याण–मनमाड–दौंड–सोलापूर या पर्यायी मार्गांवरून चालविण्यात येणार आहेत. यामध्ये विशाखापट्टणम–एलटीटी, कराईकल–एलटीटी, सिकंदराबाद–राजकोट, एमजीआर चेन्नई–अहमदाबाद, सोलापूर–अजमेर, एलटीटी–विशाखापट्टणम, अहमदाबाद–एमजीआर चेन्नई, राजकोट–सिकंदराबाद, पोरबंदर–सिकंदराबाद, पुणे–संतरागाछी आदी गाड्यांचा समावेश आहे.

याशिवाय, होस्पेट–सीएसएमटी, सोलापूर–सीएसएमटी, केएसआर बेंगळुरू–सीएसएमटी आणि कोल्हापूर–सीएसएमटी या गाड्या पुणे किंवा खडकी येथेच शॉर्ट टर्मिनेट करण्यात आल्या आहेत. तर सीएसएमटी–कोल्हापूर, सीएसएमटी–केएसआर बेंगळुरू, सीएसएमटी–सोलापूर आणि सीएसएमटी–होस्पेट या गाड्या पुणे अथवा खडकी येथून शॉर्ट ओरिजिनेट करण्यात येणार आहेत. रेल्वे प्रशासनाने प्रवाशांनी प्रवासापूर्वी आपल्या गाडीचे अद्ययावत वेळापत्रक तपासूनच प्रवास करण्याचे आवाहन केले आहे.