Ashadhi Wari – संतश्रेष्ठ श्रीसंत ज्ञानेश्वर महाराज आणि जगद्गुरू श्रीसंत तुकाराम महाराज पालखी प्रस्थान सोहळ्यासाठी श्री क्षेत्र आळंदी आणि देहू नगरीत राज्यभरातून लाखो भाविक येतात. त्या पार्श्वभूमीवर पुणे महानगर परिवहन महामंडळाकडून (पीएमपीएमएल) भाविकांच्या सोयीसाठी नियमित बससह जादा बसगाड्यांचे नियोजन केले आहे. पालखी सोहळ्यानिमित्त दि. ५ ते ९ जुलै या कालावधीत पुणे शहर, उपनगरे आणि पिंपरी-चिंचवडमधील मुख्य स्थानकांवरून विशेष बसेस धावणार आहेत.

त्यामध्ये आळंदीसाठी स्वारगेट, मनपा भवन, हडपसर, पुणे स्टेशन, निगडी, भोसरी, हिंजवडी आणि चिंचवड येथून नियमित बसेससह दररोज एकूण १७९ बसेस उपलब्ध राहतील. श्री क्षेत्र आळंदीसाठी बुधवार, दि. ८ जुलै रोजी भाविकांची गर्दी लक्षात घेता रात्री १२ वाजेपर्यंत बसेसची व्यवस्था करण्यात आली आहे. एक दिवसाच्या मुक्कामानंतर दि. ९ जुलै रोजी आळंदी येथून माउलींच्या पालखीचे पुण्याच्या दिशेने प्रस्थान होणार आहे.

यावेळी भाविकांना पहाटेच आळंदीत येता यावे, यासाठी पहाटे ०२.३० वाजल्यापासून स्वारगेट, पुणे स्टेशन, हडपसर आणि मनपा येथून १८ जादा बसेस धावतील. तर सकाळी साडेपाचपासून नेहमीच्या मार्गावरील १५० बसेस आळंदीसाठी भोसरी व विश्रांतवाडीपर्यंत चालवल्या जातील. देहू येथे जाणाऱ्या वारकऱ्यांसाठी पुणे स्टेशन, मनपा भवन आणि निगडी येथून ३१ नियमित व जादा बसेस सोडल्या जाणार आहेत.

तसेच देहू आणि आळंदी या दोन्ही क्षेत्रांना जोडण्यासाठी स्वतंत्र १५ बसेसची वेगळी व्यवस्था महामंडळाकडून करण्यात आली आहे. प्रस्थान दिवशी पहाटेपासून सेवा सुरू असेल. दरम्यान, मुख्य मार्गांव्यतिरिक्त कोणत्याही भागात किमान ४० प्रवासी उपलब्ध झाल्यास, प्रवाशांच्या मागणीनुसार जादा बस देण्याची तयारी पीएमपी प्रशासनाने दर्शवली आहे.

दोन दिवसांच्या पुणे मुक्कामानंतर शनिवारी (दि. ११) दुपारी १२ ते १ या वेळेत दोन्ही पालख्या हडपसरमध्ये दर्शनासाठी थांबतील. यावेळी भाविकांसाठी महात्मा गांधी (हडपसर) स्थानकातून पुणे स्टेशन, कोथरूड, निगडी, चिंचवड आणि आळंदीकडे तर शिवरकर गार्डनमधून कात्रज-कोंढव्याकडे आणि मगरपट्टा येथून मुंढवा, चंदननगर व वाघोलीसाठी विशेष बससेवा उपलब्ध राहील.

हडपसरनंतर पालख्या सासवडकडे मार्गस्थ होताना मुख्य दिवेघाट रस्ता पूर्णपणे बंद राहील. त्यामुळे प्रवाशांच्या सोयीसाठी पीएमपीने सासवडची बसवाहतूक बोपदेव घाटमार्गे वळवली आहे. स्वारगेट, पुणे स्टेशन आणि हडपसरवरून सासवडसाठी ६० जादा बसेस धावतील. तसेच सोलापूर-उरुळी कांचन मार्ग जसा खुला होईल तशी तिथली वाहतूक टप्प्याटप्प्याने सुरू केली जाईल.