Monkey Attacks Karnataka Cricketer Uma Kashvi During Under-19 T20 Match in Nagpur : नागपूर येथील लेडी अमृतबाई डागा कॉलेज मैदानावर खेळल्या गेलेल्या महिला अंडर-१९ टी-२० ट्रॉफीच्या उपांत्यपूर्व फेरीत एक अत्यंत थरारक आणि विचित्र घटना घडली. कर्नाटक आणि विदर्भ यांच्यातील चुरशीच्या सामन्यादरम्यान सीमारेषेवर क्षेत्ररक्षण करत असलेल्या कर्नाटकच्या १५ वर्षीय उमा कशवी हिच्या दिशेने अचानक एक वानर वेगाने धावत आला.

वानराला थेट आपल्या अंगावर येताना पाहून कशवी प्रचंड घाबरली आणि स्वतःचा बचाव करण्याच्या प्रयत्नात तोल जाऊन थेट मैदानावर कोसळली. सुदैवाने वानर तिच्या जवळून निघून गेला आणि तिला कोणतीही दुखापत झाली नाही. या अंगावर काटा आणणाऱ्या प्रसंगाचा व्हिडीओ सध्या सोशल मीडियावर तुफान व्हायरल होत आहे.

भीतीतून सावरत उमा कशवीचा चेंडूने कहर; कर्नाटकचा ६ धावांनी विजय –

Monkey Makes A Surprise Entry During Under-19 Women’s T20 Match 😂

May Be For Some Mann Ki Baat 😜 https://t.co/vjlIwcC3kj

— Khan (@Khanmohammed12) October 23, 2026

भीतीने थरकाप उडालेला असतानाही उमा कशवीने आपली एकाग्रता ढळू दिली नाही. या धक्क्यातून सावरत तिने चेंडू हातात घेतला आणि मैदानावर विदर्भाच्या फलंदाजांची अक्षरशः दाणादाण उडवली. कशवीने आपल्या ४ षटकांच्या स्पेलमध्ये अवघ्या १८ धावा देत विदर्भाचे ३ आघाडीचे फलंदाज तंबूत धाडले. तिच्या या भेदक आणि सामना जिंकवणाऱ्या माऱ्याच्या जोरावर कर्नाटकने अत्यंत चुरशीच्या सामन्यात विदर्भाचा ६ धावांनी पराभव करत स्पर्धेच्या उपांत्य फेरीत दिमाखात धडक मारली.

कर्नाटकची उपांत्य फेरीत धडक; २४ ऑक्टोबरला बडोद्याविरुद्ध लढत –

 

View this post on Instagram

 

सामन्यात नाणेफेक जिंकून प्रथम फलंदाजी करताना कर्नाटक संघाने २० षटकांत ७ बाद १४० धावा केल्या होत्या. यामध्ये खुशी सूर्यकांत (नाबाद ३३) आणि कर्णिका कार्तिक (२३) यांनी उपयुक्त योगदान दिले. १४१ धावांच्या लक्ष्याचा पाठलाग करताना विदर्भाचा संघ २० षटकांत ७ बाद १३४ धावांपर्यंतच मजल मारू शकला. आता २४ ऑक्टोबर रोजी नागपुरातच रंगणाऱ्या पहिल्या उपांत्य फेरीत कर्नाटकचा सामना बडोद्याशी होईल, तर दुसऱ्या उपांत्य फेरीत दिल्ली आणि हरियाणा आमनेसामने असतील.

हेही वाचा – IND W vs ZIM W : प्रतिका रावलचे शतक अन् शफाली वर्माचे वादळ; भारताचा पहिल्या वनडेत झिम्बाब्वेवर ९ गडी राखून एकतर्फी विजय

डब्ल्यूपीएल २०२७ च्या लिलावापूर्वी फ्रँचायझींचे वेधले लक्ष –

उमा कशवीचे हे धडाकेबाज प्रदर्शन तिच्या कारकिर्दीसाठी अत्यंत मोलाच्या टप्प्यावर आले आहे. महिला प्रीमियर लीग २०२७ (WPL 2027) च्या आगामी लिलावासाठी तिने १० लाख रुपयांच्या बेस प्राईससह नोंदणी केली आहे. मैदानावर घडलेल्या विचित्र घटनेनंतर ज्या प्रकारे कशवीने प्रचंड दबावाखाली परिपक्व कामगिरी साकारली, त्यामुळे लिलावात अनेक फ्रँचायझी तिच्यावर मोठी बोली लावण्यासाठी उत्सुक असल्याचे दिसत आहे.