Wasim Jaffer Statement : ‘निवड समितीला सर्फराझला संघात घ्यायचेच नाही’; सातत्याने डावलल्याने माजी खेळाडूने व्यक्त केला वेगळाच संशय
Wasim Jaffer Statement : वसीम जाफरचा असा विश्वास आहे की निवड समितीला सर्फराझ खानला भारतीय संघात घ्यायचे नाही.
Wasim Jaffer statement on Sarfaraz Khan Snub from Team India Test Squad : देशांतर्गत क्रिकेटमध्ये सातत्याने धावा करुनही सर्फराझ खानला भारतीय कसोटी संघातून सातत्याने डावलले जात असल्याने, माजी सलामीवीर वसीम जाफर याने तीव्र नाराजी व्यक्त केली आहे. सर्फराझला कसोटी संघातून बाहेर ठेवण्यामागे मैदानातील कामगिरीपेक्षा मैदानाबाहेरील वेगळीच कारणे असू शकतात, असा गंभीर संशय जाफरने व्यक्त केला आहे. देशांतर्गत क्रिकेटमध्ये स्वतःला वारंवार सिद्ध केल्यानंतरही न्यूझीलंडविरुद्धच्या आगामी कसोटी मालिकेसाठी सर्फराझचा विचार न झाल्याने क्रिकेट वर्तुळात पुन्हा एकदा वादाला तोंड फुटले आहे.
‘नक्कीच काहीतरी गडबड आहे’; जाफरचा निवड समितीवर थेट निशाणा
आपल्या युट्यूब चॅनलवर परखड मत मांडताना वसीम जाफर म्हणाला की, “मला खात्री आहे की नक्कीच काहीतरी गडबड सुरू आहे. निवड समितीला सर्फराझची निवड करायचीच नाहीये, हे उघड दिसते. कारण त्याची फलंदाजीची आकडेवारी सर्वांसमोर आहे. त्याने आपल्या छोट्याशा प्रथम श्रेणी कारकिर्दीत तब्बल १८ शतके झळकावली आहेत. मला यामागचे नेमके कारण माहीत नाही; मात्र त्याला बाहेर ठेवण्यामागे क्रिकेट आणि मैदानातील कामगिरीव्यतिरिक्त इतर बाबी कारणीभूत असाव्यात असे वाटते.”
कसोटीत शतक ठोकूनही दुर्लक्ष; संघातून सतत आत-बाहेर –
🚨 WASIM JAFFER SLAMS SELECTORS FOR IGNORING SARFARAZ KHAN FROM SELECTION IN TEST CRICKET 🚨
Wasim Jaffer said 🗣️,
“I feel there is definitely something. I feel that they don’t want to pick him. Otherwise, the performance is in front of us. He has 18 first–class hundreds in such a small career. I don’t know the reason, but I think it’s beyond performance and cricketing reasons. I just feel that they don’t want to pick Sarfaraz Khan, irrespective of how many runs he scores.”
— Cricket Central (@CricketCentrl) October 23, 2026
सर्फराझ खान २०२४ मध्ये न्यूझीलंडविरुद्धच्या घरच्या कसोटी मालिकेत शेवटचा खेळला होता, जिथे त्याने दमदार शतकही ठोकले होते. त्यानंतर ऑस्ट्रेलिया दौऱ्यावर त्याला केवळ राखीव बाकावर बसावे लागले आणि पुढे भारत ‘अ’ संघात पाठवून थेट संघातून वगळण्यात आले. ऑगस्टमध्ये श्रीलंकेविरुद्धच्या कसोटी मालिकेत साई सुदर्शनच्या जागी त्याचा समावेश झाला खरा, मात्र दोन्ही सामन्यांत त्याला प्लेइंग इलेव्हनमध्ये संधी मिळाली नाही. आता आगामी न्यूझीलंड दौऱ्यासाठी त्याला पुन्हा एकदा संघातून थेट डच्चू देण्यात आला आहे.
कितीही धावा केल्या तरी निवडणार नाहीत; रणजीमध्ये पुन्हा १५४ धावांचा तडाखा –
सर्फराझने भारतासाठी खेळलेल्या कसोटी सामन्यांमध्ये चांगली कामगिरी केली असूनही त्याला दुर्लक्षित केले जात आहे. जाफर म्हणाला की, “सर्फराझने देशांतर्गत क्रिकेटमध्ये आता कितीही धावा केल्या किंवा त्याची सरासरी कितीही चांगली असली, तरी निवडकर्ते त्याला संघात घेणार नाहीत असेच दिसते.” दरम्यान, राष्ट्रीय संघात पुनरागमनासाठी संघर्ष करणाऱ्या सर्फराझने हिमाचल प्रदेशविरुद्धच्या रणजी करंडक एलिट ग्रुप ‘डी’ लढतीत २२८ चेंडूंत १९ चौकारांसह १५४ धावांची वादळी खेळी साकारून पुन्हा एकदा टीकाकारांना सडेतोड उत्तर दिले आहे.
