MLC Election Pune- महायुतीच्या जागा वाटपामध्ये विधान परिषदेच्या पुणे शिक्षक व पदवीधर मतदार संघ भाजपच्या वाट्याला आले आहेत. शिक्षक मतदार संघाच्या उमेदवारीसाठी शिवसेनेने दावा केला होता व त्यासाठी शिवसेनेच्या इच्छुकांची जोरदार तयारीही सुरु केली होती. मात्र त्यात त्यांना यश मिळाले नाही. या निवडणुकीसाठी उमेदवारी अर्ज दाखल करण्यासाठी ६ ऑक्टोबरपर्यंत मुदत देण्यात आली आहे. उमेदवारी अर्जांची छाननी ७ ऑक्टोबरला होणार आहे.

उमेदवारी अर्ज मागे घेण्यासाठीही ७ ऑक्टोबरची मुदत आहे. निवडणुकीसाठी २३ ऑक्टोबरला मतदान तर मतमोजणी २७ ऑक्टोबरला आहे. आत्तापर्यंत शिक्षक मतदार संघासाठी १३७ उमेदवारी अर्ज वाटप करण्यात आले असून ७५ इच्छुक उमेदवारींनी निवडणूक कार्यालयातून अर्ज नेले आहे. त्यातील केवळ चार उमेदवारानींच अर्ज दाखल केले आहेत. पदवीधर मतदार संघासाठी एकुण अर्ज वाटप झाले असून ३३ इच्छुक उमेदवारींनी अर्ज नेले आहेत.

त्यातील आठ उमेदवारांनी अर्ज दाखल केले आहेत. पुणे शिक्षक मतदार संघातील काँग्रेसचे विद्यमान आमदार जयंत आसगावकर यांना पुन्हा एकदा उमेदवारी देण्यात आली आहे. काँग्रेसचे राष्ट्रीय अध्यक्ष मल्लिकार्जुन खर्गे यांच्या मान्यतेने सरचिटणीस के.सी.वेणुगोपाल यांनी त्यांच्या उमेदवारीचे अधिकृत पत्रही जारी केले आहे. या शिक्षक मतदार संघासाठी महायुतीत भाजप, शिवसेना आणि राष्ट्रवादी काँग्रेस या तिन्ही पक्षांमध्ये जोरदार रस्सीखेच सुरू होती.

जागा वाटपाचा तिढा उशीरा का होईना पण सुटला. त्यात भाजपच्या वाट्यालाच ही जागा गेली आहे. शिवसेनेकडून उमेदवारीसाठी प्रा.डॉ.सचिन सानप, मंगेश चिवटे यांच्यात तीव्र स्पर्धा निर्माण झाली होती. मंगेश चिवटे हे उपमुख्यमंत्री एकनाथ शिंदे यांचे विशेष कार्यकारी अधिकारी आहेत तर प्रा.डॉ.सचिन सानप हे उद्योगमंत्री उदय सामंत यांचे विशेष कार्यकारी अधिकारी आहेत.

याबरोबरच कौस्तुब गावडे, दत्तात्रय सावंत, नंदकुमार सागर, डॉ. मनोहर सानप हे अन्य उमेदवारही निवडणुक लढविण्यास इच्छुक आहेत. भाजपच्या वाट्याला जागा गेली असली तरी प्रा.डॉ.सचिन सानप मात्र निवडणुक लढविण्यावर ठाम असल्याची चर्चा रंगू लागली आहे. काँग्रेस वगळता अन्य कोणत्याच राजकीय पक्षांकडून अद्याप शिक्षक मतदार संघासाठी अधिकृत उमेदवारी जाहीर करण्यात आलेली नाही.

त्यामुळे आता काँग्रेसच्या जयंत आसगावकरांच्या विरोधात महायुतीकडून कोणाला उमेदवारी मिळणार याबाबत राजकीय वर्तुळात उत्सुकता निर्माण झाली आहे. पदवीधर मतदार संघासाठीही अद्याप कोणत्याच पक्षाने उमेदवारी जाहीर केलेली नाही. त्यामुळे उमेदवारीची माळ कोणाच्या गळ्यात पडणार याकडे सर्वांचे लक्ष लागले आहे.