TET Exam Scam- महाराष्ट्र राज्य परीक्षा परिषदेच्या वतीने २०१८ आणि २०१९ मध्ये घेण्यात आलेल्या शिक्षक पात्रता परीक्षा (टीईटी) घेण्यात आली होती. या परीक्षांच्या उत्तरपत्रिकामध्ये उमेदवारांनी भानगडी करून गुण वाढवल्याच्या घोटाळ्या प्रकरणी मुंबई उच्च न्यायालयाने निकाल दिला आहे. त्यानुसार भानगडी केलेल्या उमेदवारांचे परीक्षांचे निकाल रद्दचा परीक्षा परिषदेचा निर्णय कायम ठेवण्यात आला आहे.

मात्र उमेदवारांना आयुष्यभर टीईटी परीक्षा देण्यास बंदी घालण्याचा निर्णय मात्र रद्द करण्यात आला असून संबंधित उमेदवारांना भविष्यात पुन्हा टीईटी परीक्षा देण्याची संधी मिळणार आहे. कोणालाही कायमची बंदी घालण्यापूर्वी त्याला बाजू मांडण्याची संधी देणे आवश्यक असते. मात्र, नैसर्गिक न्यायाच्या तत्त्वाचे पालन झाले नव्हते. त्यामुळे जुना निकाल रद्दच राहील, मात्र पुढील परीक्षा देण्यास कोणतीही अडचण राहणार नाही, असे न्यायालयाने स्पष्ट केले आहे.

परीक्षेवरील बंदी उठवल्याने उमेदवार निर्दोष ठरले असे समजू नये. त्यांच्यावरचे आरोप कायम आहेत. शासन आणि परीक्षा परिषद चौकशी करू शकतात. चौकशीत दोषी आढळल्यास पुन्हा कारवाई होऊ शकते. टीईटी प्रकरणात न्या. किशोर संत आणि न्या. जितेंद्र जैन यांच्या खंडपीठाने निकाल दिला. याचिकाकर्त्यांतर्फे ज्येष्ठ विधिज्ञ व्ही. डी. सपकाळ, ॲड. एस. आर. सपकाळ, ॲड. ए. आर. सय्यद, ॲड. व्ही. एस. पानपट्टे आदींनी बाजू मांडली. राज्यातर्फे ज्येष्ठ विधिज्ञ व्ही. डी. होन व ॲड. पी. एस. पाटील, तर परीक्षा परिषदेच्या वतीने ॲड. ए. आर. निकम यांनी बाजू मांडली.

शिक्षक आले होते अडचणीत
या प्रकरणात आधीपासून नोकरीत असलेल्या शिक्षकांचा मुद्दाही महत्त्वाचा होता. टीईटी सक्तीची झाल्यानंतर अनेक अनुभवी शिक्षक अडचणीत आले होते. न्यायालयाने सर्वोच्च न्यायालयाच्या अंजुमन इशआत-ए-तालीम ट्रस्ट प्रकरणातील २९ मे २०२६ च्या निर्णयाचा आधार घेतला. हा निकाल नैसर्गिक न्याय आणि उमेदवारांच्या भविष्यातील संधी यांच्यातील समतोल साधणारा ठरला आहे. आता, संबंधित उमेदवार पुन्हा तयारी करून परीक्षा देऊ शकतील, मात्र चौकशीची प्रक्रिया सुरू राहण्याची शक्यता कायम आहे.