Maratha Reservation 2026 : मराठा आरक्षणाच्या मागणीसाठी झालेल्या विविध आंदोलनांतील उर्वरित ३४ मृतांच्या कायदेशीर वारसांना राज्य सरकारकडून प्रत्येकी १० लाख रुपयांची आर्थिक मदत जाहीर करण्यात आली आहे. आठ जिल्ह्यांतील या कुटुंबांसाठी एकूण ३ कोटी ४० लाख रुपयांचा निधी मंजूर करण्यात आला असून, यामुळे मनोज जरांगे पाटील यांच्या आंदोलनादरम्यान उपस्थित करण्यात आलेल्या एका महत्त्वाच्या मागणीची पूर्तता झाली आहे. (Maratha Reservation 2026)

मराठा समाजाच्या आंदोलनात आतापर्यंत एकूण ३०९ कार्यकर्त्यांचा मृत्यू झाला असून, मुख्यमंत्री देवेंद्र फडणवीस यांच्या नेतृत्वाखाली सरकारने यापूर्वीच त्यांच्या वारसांसाठी २७ कोटी ५० लाख रुपये मंजूर केले होते. मात्र, यातील ३४ कुटुंबांची मदत प्रलंबित होती.

अंतरवाली सराटी येथील उपोषणादरम्यान जरांगे पाटील यांनी हा प्रश्न लावून धरला होता. त्यानंतर मराठा आरक्षण उपसमितीचे अध्यक्ष राधाकृष्ण विखे पाटील यांनी मुख्यमंत्र्यांशी चर्चा करून ही मदत तातडीने मंजूर केली. यामध्ये बीडमधील १५, धाराशिव ५, परभणी ४, हिंगोली ४, नांदेड ३, जालना १, छत्रपती संभाजीनगर १ आणि लातूरमधील १ कुटुंबाचा समावेश आहे. (Maratha Reservation 2026)

 

दरम्यान, जरांगे यांनी उपोषण मागे घेतल्यानंतर मुख्यमंत्री देवेंद्र फडणवीस म्हणाले की, मनोज जरांगे पाटील यांना दिलेली सर्व आश्वासने जाहीर आहेत. आमचे सरकार मराठा समाजाला न्याय देण्याच्या भूमिकेवर ठाम असून, त्यानुसारच तातडीने कारवाई केली जात आहे. विखे पाटील यांनीही उपसमितीच्या बैठकीत सर्व मागण्यांवर सकारात्मक आणि वेगाने काम सुरू असल्याचे स्पष्ट केले. (Maratha Reservation 2026)